Казанлылар Яңа ел каникулларында 8 көн ял итәчәк

2023 елда биш көнлек эш атнасында 121 ял көне булачак.

Фото: Денис Гордийко

(Казан шәһәре KZN.RU, 25 нче октябрь). ТР Хезмәт, халыкны эш белән тәэмин итү һәм социаль яклау министрлыгы 2023 елга җитештерү календарен бастырды. Биш көнлек эш атнасында, ике ял көне белән, эш көннәре саны 244 булачак, ял көннәре – 121 көн, шул исәптән 17 эшләми торган бәйрәм көн.
Җитештерү календаре нигезендә, Татарстанда 2023 елда эшләми торган бәйрәм көннәре булып түбәндәгеләр саналачак:

1-6 нчы гыйнвар һәм 8 нче гыйнвар – Яңа ел каникуллары;

7 нче гыйнвар – Раштуа бәйрәме;

23 нче февраль – Ватанны саклаучылар көне;

8 нче Март – Халыкара хатын-кызлар көне;

1 нче Май – Яз һәм Хезмәт бәйрәме;

9 нчы Май – Җиңү көне;

12 нче июнь – Россия көне;

30 нчы август – Татарстан Республикасы көне;

4 нче ноябрь – Халыклар бердәмлеге көне;

6 нчы ноябрь – Татарстан Конституциясе көне;

Ураза бәйрәме һәм Корбан бәйрәме.

Ай календаре һәм барлыкка килгән традицияләр нигезендә Ураза бәйрәме һәм Корбан бәйрәме башлану көннәре ТР Президенты Указы белән билгеләнә. ТР мөселманнары Диния нәзарәте мәгълүматлары буенча, Ураза бәйрәменең якынча датасы – 21 нче апрель, Корбан бәйрәменеке – 28 нче июнь.

Ял көннәре һәм эшләми торган бәйрәм көннәре туры килсә, ял көннәре бәйрәмнән соң килгән эш көненә күчерелә (гыйнвар бәйрәмнәреннән кала). Киләсе елда түбәндәге ял көннәре күчереләчәк: 1 нче гыйнвар якшәмбесе – 24 нче февральнең җомгасына, 8 нче гыйнвар якшәмбесе – 8 нче май дүшәмбесенә.

Эшләми торган бәйрәм көненә кадәр булган эш көненең яки сменаның озынлыгы бер сәгатькә кими, дип хәбәр итә ТР Хезмәт, халыкны эш белән тәэмин итү һәм социаль яклау министрлыгының матбугат хезмәте.

Шулай ук укыгыз

Барлык яңалыклар