12 апрельдә Казанлылар таушалган шиналарны эшкәртүгә тапшыра алачак

Эшкәртелгән резина валчыгыннан спорт мәйданчыклары өчен өслекләр әзерләячәкләр

Казанда яшәүчеләр шимбә көнне, 12 апрельдә, таушалган шиналарны эшкәртүгә тапшыра алачак. Шиналарны заводларның берсенә резина валчыгы алу өчен җибәрәчәкләр. Аннан соң спорт мәйданчыклары өчен өслекләр әзерләячәкләр.

Җыючы автомобиле ягулык салу станцияләрендә Магистральная урамы, 33к2 һәм Минская урамы, 1а адресы буенча узачак. Акциядә катнашучылардан ике комплекттан артык шина кабул ителмәячәк. Акциядә катнашырга теләүче юридик затлар +7(843)239-02-03 телефоны буенча мөрәҗәгать итә ала.

Таушалган шиналарны 11:00 дән 16:00 га кадәр кабул итәчәкләр, дип хәбәр иттеләр «ЭкоЛогично» хәрәкәтенең Telegram-каналында.

Акция «Газпромнефть» АЗС һәм «Охота на колеса» проекты тарафыннан «Яшел – яңа кара» экология проекты кысаларында уза.