Казанлыларны режиссёр Сергей Женачев белән иҗади очрашуга чакыралар

Танылган театр эшлеклесе белән барлык теләүчеләр дә аралаша ала.

(Казан шәһәре KZN.RU, 17-нче июнь). Казан халкын танылган режиссер, «Театр сәнгате студиясе» Мәскәү театры һәм А.П.Чехов исемендәге Мәскәү сәнгать театры директоры, сәнгать җитәкчесе, Россиянең атказанган сәнгать эшлеклесе Сергей Женович белән иҗади очрашуга чакыралар. Ул 18-нче июньдә Качалов театрының кече сәхнәсендә узачак.

Иҗади очрашу 16.00 сәгатьтә башлана. Чарага керү ирекле.

Сергей Женович җитәкчелегендәге «Театр сәнгате студиясе» Казанга беренче тапкыр килә һәм берьюлы өч спектакль тәкъдим итә: А.П.Чеховның «Три сестры», «Записные книжки» һәм Николай Эрдманның «Самоубийца» әсәрләре. Гастрольләр В.И.Качалов исемендәге Казан академия рус зур драма театры сәхнәсендә РФ Мәдәният министрлыгының гастрольләр эшчәнлегенә ярдәм итү федераль үзәге катнашында «Европа – Россия – Азия» Халыкара театр фестивале кысаларында уза.

«Театр сәнгате студиясе» - Россиядә иң популяр һәм танылган театрларның берсе. Аның репертуары нигезендә - дөнья әдәбияты классиклары әсәрләре, элек сәхнәдә куелмаган, аз билгеле яисә, киресенчә, театр сәхнәләрендә сирәк барган күренекле әсәрләр. «Театр сәнгате студиясе»нең яраткан авторлары арасында Достоевский, Булгаков, Чехов, Эрдман, Некрасов, Платонов, Ерофеев һәм башкалар бар. Театр үз тарихында 6 тапкыр «Алтын битлек» Милли театраль премиясе лауреаты һәм күп тапкыр номинанты булды. Ә соңгы елларда «Театр сәнгате студиясе» гастрольләре АКШТА, Көньяк Кореяда, Польшада, Латвиядә, Литвада, Эстониядә, Белоруссиядә, Украинада узды, дип хәбәр итәләр В.И.Качалов исемендәге Казан академия рус зур драма театрында.

Шулай ук укыгыз

Барлык яңалыклар