Казанлыларны менталь сәламәтлек турында «НормальНо» интерактив спектакленә чакыралар

Тамашаны карау өчен алдан теркәлергә кирәк

Елена Гредюшко фотосы

Җомга көнне, 7 ноябрьдә М.Сәлимҗанов исемендәге Актерлар йортында «Э-моция» иҗади инклюзия студиясе тамашачыларга бушлай спектакль күрсәтә. Иҗат төркеме менталь сәламәтлек турында импровизациягә корылган интерактив күзаллау рәвешендәге уен тәкъдим итә.

«НормальНо» спектакленең режиссеры – Неля Суркина. Тамаша барышында актерлар бер-берсе һәм зал белән элемтәгә кереп, «Син хәзерге вакытта ничек?», «Син үзеңне ничек хис итәсең?», «Ә мин ни хәлдә?» сорауларына җавап бирәчәк.

Спектакльдә катнашучылар, тамашачыга, профессиональ булмаган, ә бәлки сәламәтлеге чикле актер сәхнәдә үзен һәм үз тәҗрибәсен тәкъдим итә дигән фикерне җиткерәчәк. Спектакль тамашачылары, актерлар белән аралашып яки сәхнәдән сөйләп, спектакль тудыруда турыдан-туры катнашучы булачак, дип хәбәр итә «Э-моция» иҗат студиясенең матбугат хезмәте.

Спектакль 19:00 сәгатьтә башлана. Тамашаны карау өчен алдан теркәлергә кирәк.

«НормальНо» спектакле – IV Бөтенроссия «Театр – тигез мөмкинлекләр территориясе» ачык парафестиваленең «Иң яхшы интерактив спектакль» номинациясе лауреаты. Моннан тыш, «Э-моция» студиясе Халыкара инклюзия тәҗрибәләр фестиваленең «Иң яхшы иҗади инклюзия коллективы» номинациясе, «Казанның кече театрлары» телевизион бәйгесе, «Россия иреклесе – 2019» Бөтенроссия конкурсы җиңүчесе.

Шулай ук укыгыз

Барлык яңалыклар