Казан метросы һәм «МТС» IT-инфраструктураны көчәйтәчәк

Казан метросы һәм «МТС» IT-инфраструктураны көчәйтәчәк

<p> Халыкара Kazan Digital Week форумында «Метроэлектротранс» муниципаль унитар предприятиесе һәм «МТС» кәрәзле элемтә операторы килешү имзалады. Цифрлы инфраструктураны ныгыту һәм көн саен 130 меңгә якын пассажир йөртә торган Казан метрополитены эшенә заманча IT-технологияләр кертү хезмәттәшлекнең төп максаты булып тора. </p> <p> Килешү метроның цифрлы өлешен көчәйтү буенча комплекслы эшне күздә тота. Аерым алганда, килешүдә бөтен метрополитен территориясендә мобиль элемтәне тотрыклы эшләтү, хезмәт һәм технология ихтыяҗлары өчен саклана торган каналлар булдыру, шулай ук эчке коммуникацияләр өчен шәхси челтәрләрне үстерү мәсьәләләре турында сүз бара. </p> <p> Партнерлар үзебезнең илдә җитештерелгән җиһазларга һәм программа тәэминатына нигезләнгән импортка бәйле булмаган чишелешләрне кертүгә басым ясаячак, яклар арасында фәнни-техник тәҗрибә белән уртаклашу да каралган. </p> <p> «Метроэлектротранс» генераль директоры Айдар Габделхаков ассызыклаганча, предприятиедә заманча технологияләр актив кулланыла. Контактсыз түләү һәм поездлар хәрәкәтен автоматлаштыру моның ачык мисалы булып тора. </p> <p> «Элемтә инфраструктурасын үстерү һәм технологик партнерларга теләктәшлек белдерү предприятиенең нәтиҗәлелеген арттыру өчен мөмкинлекләр чыганагы, һәм, иң мөһиме, бу безнең шәһәр халкының уңайлы һәм имин сәфәрләрен тәэмин итү юлы», - дип билгеләп үтте генераль директор Айдар Габделхаков. </p> <p> Татарстанда МТС директоры Марат Кабанов республика башкаласында җиде районның бишесендә метро булганлыгын әйтеп үтте. Аның сүзләренчә, һәр станция МТС ның LTE-каплагычы белән тәэмин ителгән. Беренче яртыеллыкта гына да метрода МТС абонентлары файдаланган интернет-трафик күләме узган ел белән чагыштырганда 35% ка арткан. </p> <p> 2024 елның язында компания «Дубравная» станциясендә яңа LTE-җиһазлар урнаштырган. Киләчәктә әлеге станция Казан метрополитенының барлык станцияләрен дә 100% LTE-каплагычы белән тәэмин итүче икенче тармакка күчеп утыру урыны булачак. </p> <p> Үз чиратында Татарстан Республикасы цифрлы үсеш министры Айрат Хәйруллин транспорт тармагына караган барлык цифрлы трансформацияләрнең ил күләмендә гамәлгә ашырыла торган «Мәгълүматлар икътисады» һәм «Нәтиҗәле транспорт системасы» проектларының максатларына һәм бурычларына туры килүен әйтте. </p> <p> Элегрәк «Метроэлектротранс» муниципаль унитар предприятиесенең Kazan Digital Week форумында «Яндекс Go» белән контактсыз түләүне кертү мәсьәләсе турында килешүне <a target="_blank" href="https://kzn.ru/meriya/press-tsentr/novosti/v-kazanskom-elektrotransporte-poyavitsya-beskontaktnaya-oplata-proezda-cherez-mobilnoe-prilozhenie/?lang=ta">имзалавы</a> хакында хәбәр ителгән иде. </p>

2025-09-18T13:39:39+0300