Казан УНИКСы үз кырында ЦСКАны җиңде

ВТБ лигасы кысаларында узган элеккеге очрашуларда казанлылар Мәскәү клубын нибары 4 тапкыр җиңделәр һәм 17 тапкыр җиңелделәр.

(Казан шәһәре KZN.RU, 3-нче декабрь). Кичә Казан УНИКСы үз кырында Мәскәү ЦСКАсын җиңде. ВТБ Бердәм лигасы матчы «Баскет-холл»да 94:86 исәбе белән тәмамланды.

Казан клубы баскетболчылары көндәшләренә уенның беренче чирегендә генә оттырды. Иң нәтиҗәле уенчылар Морган, Макколлум, Смит һәм Колесников булды.

ВТБ лигасы кысаларында узган очрашуларда казанлылар ЦСКАны нибары дүрт тапкыр отты, шул исәптән узган сезонда ике тапкыр. Алар барлыгы 17 җиңелүгә дучар булды.

Турнир таблицасында мәскәүлеләр, 9 җиңүнең 6-сы белән 3-нче урынны алып, УНИКСтан алда бара. Казанлылар арсеналында әлегә 9 матчта 5 җиңү бар.

Элегрәк быелгы үз кырындагы сериядә УНИКС Франция «Нантер – 92» һәм Питербург «Зенит»ыннан ике җиңелүгә дучар булды. Соңгы уен 7-нче декабрьдә 18.00 сәгатьтә Польшаның «Зелена Гура» командасына каршы узачак, дип хәбәр ителә баскетбол командасы сайтында.

Шулай ук укыгыз

Барлык яңалыклар