Казан шеф-повары Джакартада халыкара чемпионатта алтын яулады

Казан шеф-повары Джакартада халыкара чемпионатта алтын яулады

<p> Казанның «Татар утары» рестораны шеф-повары Рамил Мөхәммәтҗанов «Indonesia International Halal Chef Competition» (Iihcc) халыкара шеф-поварлар чемпионатында алтын медаль яулады. Конкурс Джакартада 9–11 октябрьдә Индонезия шәригать икътисадый фестивале (ISEF) кысаларында узды. Бу хакта «Татар-информ» мәгълүмат агентлыгында узган матбугат конференциясендә Казан һәм ТР рестораторлары һәм отельерлары ассоциациясе президенты Зөфәр Гаязов хәбәр итте. </p> <p> Абруйлы гастрономия ярышларында ислам дөньясының 20 иленнән кулинарлар катнашты. Россияне беренче тапкыр Татарстан командасы тәкъдим итте – Рамил Мөхәммәтҗанов абсолют җиңүче булды. </p> <p> «Безнең шеф-поварлар мондый әһәмиятле гастрономик вакыйгаларда катнашканда бу чыннан да кыйммәт тора. Һәм, әлбәттә, бу Казанның Россиянең генә түгел, бөтен дөньяның гастрономия башкаласы булуын тагын бер кат исбатлый. Нәкъ менә безнең шеф-поварның шундый бөек вакыйгада ил исеменнән чыгыш ясавы һәм алтын медаль яулавы бик шатлыклы. Шәһәр һәм республика өчен чын горурлык хисе уяна», – дип билгеләп үтте Казан шәһәренең туризмны үстерү комитеты директоры Дарья Санникова. </p> <p> Ул мондый казанышлар Казанны туризм һәм кунакчыллык өлкәсендә алга этәрергә мөмкинлек бирә, аны танылырлык һәм җәлеп итүчән итә, дип өстәде. «Без барыбыз бергә яулап алучы һәм илһамландыручы тәмле, җылы һәм кунакчыл мохит тудырабыз», – диде Дарья Санникова. </p> <p> Финалга нибары ун катнашучы чыкты. Аларның һәркайсына Индонезия территориясендә генә үстерелгән яки чыгарылган продуктларның бертөрле җыелмасы булган «кара тартмалар» биргәннәр. «Кара тартма» составын пешекчеләр ярышның этабы башланган вакытта гына белгәннәр. 90 минут эчендә бер ризыкның биш порциясен уйлап табу һәм әзерләү бурычы торган. </p> <p> «Мин җиңү артыннан бардым. Әлбәттә, авырлыклар булды, әмма бу бары тик вак-төяк. Остазым Зөфәр Гаязов кулыннан килгәнчә ярдәм итте, без җиңәрбез дидек тә, җиңдек!» – дип уртаклашты Казан шеф-повары. </p> <p> Ярышларда Рамил Мөхәммәтҗанов кукуруз, чили һәм кокос сөте өстәп, Кения фасоленнән гарнир һәм мусс белән балык рулеты әзерләргә булды. Халыкара жюри тәмен генә түгел, ә әзерләүнең югары технологик дәрәҗәсен дә билгеләп үтте. </p> <p> «Рамилнең үзе өчен барысы да гади булып күренде, әмма чынлыкта бу төрле текстуралы катлаулы ризык. Сәгать ярым – күп түгел: балыкны чистартырга, филе эшкәртергә һәм ахырда ашамлыкны дөрес һәм матур тапшырырга кирәк. Халыкара хөкемдарлар моны югары бәяли чөнки пешекче кыска вакыт эчендә катлаулы гастрономик әсәр тудыра. Катнашучыларның күбесе гади ризыкларны сайлады, әмма Рамил катлаулы юл белән китте һәм җиңде», – дип сөйләде «УМАЙ» ресторанының шеф-повары Рөстәм Рәхимов.    </p> <p> Иң күп баллны катнашучылар ризыкның тәмле сыйфатлары өчен алганнар, әмма хөкемдарлар шулай ук әзерләү барышын да бәяләгәннәр. Мөһим критерийларның берсе продуктларны акыллы куллану булды. Жюри катнашучыларның ингредиентлар һәм аларның калдыклары белән ничек эш итүләренә игътибар итте. Мәсәлән, Рамил Мөхәммәтҗанов балык сөякләрен ташлау урынына алардан шулпа әзерләгән һәм аны пешерү барышында кулланган. </p> <p> Чемпионатның финал этабы нәтиҗәләре буенча беренче урынны Россия яулады, көмешне Иордания алды, ә өченче һәм дүртенче урыннарны Индонезия пешекчеләре алды. </p> <p> Татарстан командасының уңышы – даими эшнең закончалыклы нәтиҗәсе, дип ассызыклады ТР Рестораторлар һәм отельерлар ассоциациясе генераль директоры Галина Шәрәфетдинова. 2008 елда ук Казанда беренче тапкыр Юныс Әхмәтҗанов исемендәге пешерү осталыгы конкурсы уздырылган иде, ул бүген ислам илләренең яшь пешекчеләре халыкара турнирына әверелде. </p> <p> Галина Шәрәфетдинова билгеләп үткәнчә, гастрономия белән бәйле барлык чаралар да Татарстан пешекчеләренә, яшь белгечләргә һәм профильле югары уку йортлары студентларына үз тәҗрибәләрен үстерергә һәм камилләштерергә мөмкинлек бирә. </p> <p> «2008 елда беренче тапкыр Юныс Әхмәтҗанов исемендәге Пешерү сәнгате конкурсы оештырылды. Шуннан бирле күп вакыт үтте, һәм бүген без нәтиҗәләрне күрәбез. Безнең өчен иң мөһиме – һөнәрнең абруен күтәрү, аңа яшьләрне җәлеп итү. Бу конкурслар гади пешекчедән шеф-поварга кадәр юлны үтеп, югары нәтиҗәләргә ирешүнең тере мисалларын күрсәтә», – дип билгеләп үтте ТР Рестораторлар һәм отельерлар ассоциациясе генераль директоры Галина Шәрәфетдинова. </p> <p> Конференция азагында Дарья Санникова киләсе елга гастрономия чаралары темасына кагылды. Мәсәлән, шәһәр өчен «Тәмле Казан» фестивален үткәрү гадәткә әверелде, быел ул бөтен Россиядән 85 мең кунак һәм 100дән артык катнашучыны җыйды. </p> <p> «Аннан башка шәһәрнең паркларында һәм иҗтимагый киңлекләрендә вакыйгалы программа кысаларында формалашкан башка гастрономик чаралар да булачак. Без шулай ук кышкы Казан тагын да әкиятирәк һәм туристлар өчен кызыклырак булсын өчен яңа елга бәйрәм проектлары әзерлибез. Ноябрьдә гадәттәгечә казга багышланган фестиваль уза, бу шәһәр кунакларына ошый торган кызыклы традиция. Һәм, әлбәттә, төп гастрономик вакыйга булып Сабантуй кала, ул Татарстан мәдәниятен, гореф-гадәтләрен һәм милли ризыкларын берләштерә», – дип сөйләде Дарья Санникова. </p> <p> Исегезгә <a target="_blank" href="https://kzn.ru/meriya/press-tsentr/novosti/ilsur-metshin-4-5-tysyachi-kazantsev-sdayut-turistam-11-tysyach-kvartir/">төшерәбез</a>, соңгы сигез айда Казанда 3,3 миллионнан артык турист булган, бу 2024 елның шул ук чоры белән чагыштырганда 6% ка күбрәк. Шәһәр кунаклары өчен танылган ризыклар арасында элеккечә чәк-чәк, өчпочмак һәм әлеш кала. </p>

2025-10-17T14:56:24+0300