Казан гимнасты Даниел Маринов иң көчле спортчыларның Бөтенроссия спартакиадасында бронза медаль яулады

Ул олимпия чемпионнары Никита Нагорный һәм Давид Белявскийга оттырды.

Фото: ТР Спорт министрлыгы

(Казан шәһәре KZN.RU, 29 нчы сентябрь). Казан гимнасты Даниел Маринов 2022 елгы иң көчле спортчылар арасында җәйге спорт төрләре буенча Бөтенроссия спартакиадасында берничә ярышны берләштергән дисциплинада бронза медаль яулады.

Ярышлар нәтиҗәләре буенча, алты күнегүдә Даниел Маринов 164,930 балл җыйды, шуның нәтиҗәсендә өченче урынны яулады. Казан гимнастын олимпия чемпионнары Никита Нагорный (166,830 балл) һәм Давид Белявский (165,029 балл) узып китте, дип хәбәр итә ТР Спорт министрлыгының матбугат хезмәте.

Даниел Маринов Казанның «Центральный» физкультура-спорт оешмасы каршындагы «Первая» спорт мәктәбендә шөгыльләнә.

Спорт гимнастикасы буенча турнир 26 нчы сентябрьдә старт алды һәм 1 нче октябрьгә кадәр дәвам итәчәк. Ярышлар ир-атлар һәм хатын-кызлар арасында шәхси һәм команда ярышларын, шулай ук аерым төрләрдә ярышларны үз эченә ала.

Исегезгә төшерәбез, 26 нчы сентябрьдә составына Казан гимнастлары Артур Синичкин һәм Даниел Маринов кергән Татарстан Республикасы җыелма командасы иң көчле спортчыларның Бөтенроссия спартакиадасында команда ярышларында бронза медаль яулады. Татарстан спортчыларын Мәскәү һәм Владимир өлкәсе гимнастлары узып китте.

Шулай ук укыгыз

Барлык яңалыклар