Казанның чыгарылыш сыйныф укучыларына 1 нче февральгә кадәр БДИ тапшыру өчен гариза бирергә кирәк

Бердәм дәүләт имтиханының төп этабы 26 нчы майдан 1 нче июльгә кадәр узачак.

Фото: Денис Гордийко

(Казан шәһәре KZN.RU, 17 нче гыйнвар). 1 нче февральгә кадәр Казан чыгарылыш сыйныф укучылары бердәм дәүләт имтиханын узу өчен гариза бирә ала. Анда сайланган предметлар исемлеген күрсәтергә кирәк.

Рус теле һәм математика буенча имтиханнар 2023 елда тәмамлаучылар өчен мәҗбүри, чөнки аларны уңышлы узу урта гомуми белем турында аттестат алу өчен кирәк. 11 нче сыйныф укучылары математика буенча БДИның бер генә дәрәҗәсен сайлый ала: база яки профильле. Узган елны тәмамлаучылар математикадан имтиханны профиль дәрәҗәсендә генә яза ала. Калган фәннәрне укучылар үзләре сайлап тапшыра, алар вузга керергә теләүчеләргә кирәк. Предметларны белгечлекне яки әзерлек юнәлешен исәпкә алып сайларга кирәк. Гариза биргәнче мондый мәгълүмат белән югары уку йортлары сайтларында танышырга киңәш ителә.

Шәхесне раслаучы документ нигезендә гаризаны чыгарылыш сыйныф укучылары яки аларның ата-аналары (законлы вәкилләр) бирә ала. Шулай ук ул вәкаләтле затлардан шәхесне раслаучы документ һәм ышанычнамә нигезендә кабул ителә.

Мәктәпне узган елны тәмамлаучылар белем алу документларының оригиналларын яки аларның сертификатланган күчермәләрен күрсәтергә тиеш. Чит ил мәгариф документының оригиналы яки күчермәсе чит телдән расланган тәрҗемә белән күрсәтелә. Техникум һәм көллият, шулай ук чит ил мәгариф оешмалары укучыларына урта гомуми белем бирү программаларын үзләштерүне яки аларны быел тәмамлауны раслаучы белешмә күрсәтергә кирәк.

11 нче сыйныф укучылары уку урыны буенча гариза бирә, ә узган елны тәмамлаучылар – яшәү урыны буенча белем бирү бүлекләренә. Заявка биргәндә сәламәтлек мөмкинлекләре чикләнгән казанлылар – психология-медицина-педагогика комиссиясе тәкъдимнәренең күчермәсен, ә инвалидлык белән тәмамлаучылар сәламәтлек үзенчәлекләре турында оригиналь белешмә яки аның сертификатланган күчермәсен күрсәтергә тиешләр. Бу имтиханнарны сәламәтлек торышын һәм чыгарылыш сыйныф укучыларының психофизик үсеш үзенчәлекләрен исәпкә алган шартларда оештыру өчен кирәк.

Быел БДИ өч этапта узачак: вакытыннан алда – 20 нче марттан 19 нчы апрельгә кадәр, төп этап – 26 нчы майдан 1 нче июльгә кадәр, өстәмә – 6 нчы сентябрьдән 19 нчы сентябрьгә кадәр. Имтиханнар җәдвәле белән сылтама буенча танышырга мөмкин. Узган еллардагы чыгарылыш сыйныф укучылары БДИны вакытыннан алда яки төп чорның резерв срокларында тапшыра, 11 нче сыйныф укучылары – төп яки вакытыннан алдагы этапларда. Имтиханнары аерым уку предметлары буенча имтихан үткәрү вакытына туры килгән чыгарылыш сыйныф укучылары резерв көннәрдә яза алалар. Экстерннар, көллият һәм техникум студентлары, шулай ук чит ил мәгариф оешмалары укучылары өчен имтиханнар вакытыннан алда үткәрелергә мөмкин, дип хәбәр итә ТР Мәгариф министрлыгы матбугат хезмәте.

Шулай ук укыгыз

Барлык яңалыклар