Казан телеманарасы җитлегеп өлгермәгән балаларга ярдәм йөзеннән шәмәхә төскә буялачак

#мнеНЕфиолетово акциясенә бүген Россиянең 33 төбәге кушылачак.

(Казан шәһәре KZN.RU, 17-нче ноябрь). Бүген кич Казан телеманарасы шәмәхә төскә буялачак. Шулай итеп, Татарстан башкаласы җитлегеп өлгермәгән балаларга ярдәм итү йөзеннән #мнеНЕфиолетово акциясенә кушылды.

17-нче ноябрьдә бөтен дөнья буйлап Җитлекмәгән балалар көне билгеләп үтелә. Россиядә мәгълүмати кампанияне бу көнгә «Право на чудо» җитлекмәгән балаларга ярдәм итү хәйрия фонды әзерләгән. Аерым алганда, #мнеНЕфиолетово акциясе оештырылды: кич белән Россиянең 33 төбәгендә биналарда һәм корылмаларда шәмәхә яктырткычлар кабыначак, бу җитлегеп өлгермәгән балаларның гаиләләренә теләктәшлек йөзеннән эшләнәчәк.

Казан телеманарасы шәмәхә төстә 22.00 сәгатькә кадәр яктыртылачак. Мәскәүдә шәмәхә утларны гадәттәгечә Кырым күперендә, Яңа Арбатта, Тверь урамында кабызачаклар. Новосибирск, Воронеж һәм Әстерханда дәүләт опера һәм балет театрлары фасадлары, Тула һәм Мурманскта филармония биналары яктыртылачак. Тверьдә, Чиләбедә һәм Якутскта Бөтендөнья җитлегеп өлгермәгән балалар көне символы шәмәхә телеманаралар булачак. Омскта шәһәр перинаталь үзәге, поликлиника һәм хастаханә биналары үзгәрәчәк. Хабаровскта җитлегеп өлгермәгән балалы гаиләләргә ярдәм йөзеннән өлкә хөкүмәте бинасы фасады яктыртылачак. Түбән Камада акциягә перинаталь үзәге булган балалар хастаханәсе кушылачак. Акциягә ярдәм йөзеннән барлыгы 100-дән артык мәдәни-тарихи, административ һәм җитештерү объектлары шәмәхә төстә яктыртылачак.

Шәмәхә төс - Европада яңа туган пациентларны кайгырту фонды (EFCNI) һәм «Право на чудо» хәйрия фондының рәсми төсе. Ул өмет, кызгану һәм ачыклыкны символлаштыра, дип хәбәр ителә акцияне оештыручылар сайтында.

Шулай ук укыгыз

Барлык яңалыклар