Казан миллионлы шәһәрләр арасында «Шәһәрләрнең IQ» рейтингында өченче урынны яулады

Шәһәр хуҗалыгын цифрлаштыру индексы РФ Төзелеш министрлыгының «Акыллы шәһәр» проектында катнашучы 203 шәһәрләр өчен исәпләнә.

Фото: Денис Гордийко

(Казан шәһәре KZN.RU, 26-нчы октябрь). Казан «Шәһәрләрнең IQ» рейтингында 1 млн кешедән торган торак пунктлар арасында өченче урынны алды. 2020 ел нәтиҗәләре буенча шәһәр хуҗалыгын цифрлаштыру индексын Россия Федерациясе Төзелеш министрлыгы тәкъдим итте.

«Шәһәрләрнең IQ» цифрлаштыру индексы Ломоносов исемендәге МДУ белән берлектә эшләнгән. Ул министрлыкның «Акыллы шәһәр» проектында катнашучы 203 шәһәр өчен исәпләнә. Аларның һәркайсы 47 юнәлешкә бүленгән күрсәткечләр буенча бәяләнә: шәһәр идарәсе, акыллы торак-коммуналь хуҗалыгы, шәһәр мохите өчен инновацияләр, акыллы шәһәр транспорты, иҗтимагый һәм экологик куркынычсызлыкның интеллектуаль системалары, туризм һәм хезмәт күрсәтү, социаль хезмәт күрсәтүләрнең интеллектуаль системалары, икътисад торышы һәм инвестклимат, элемтә челтәрләре. Бу рейтингның бурычы – Россия шәһәрләренең шәһәр хуҗалыгын цифрлы трансформацияләүне никадәр нәтиҗәле үткәрүен һәм алар сайлаган «Акыллы шәһәр» карарларының ничек эшләвен бәяләргә.

1 млн кешедән торган «Эре шәһәрләр» категориясендә 16 торак пункт бәяләнгән. Беренче урынны Мәскәү яулаган, икенче урынны – Воронеж (63,38 балл), өченче урында – Казан (60,93 балл). 2019 елда лидерлар өчлегенә Мәскәү, Екатеринбург һәм Татарстан башкаласы кергән иде.

Билгеләп үтелгәнчә, индексның уртача күрсәткеченең иң зур үсеше ике шәһәр төркемендә теркәлгән – иң эреләре арасында Казан, һәм халык саны 100 меңгә кадәр булган кечкенә шәһәрләр. Беренчесендә уңай динамика барлык 16 катнашучыда да теркәлгән, 2019 елга карата уртача балл 14,1%-ка арткан һәм 55,27 баллга җиткән.

Тулаем алганда, узган ел өчен цифрлаштыру индексының уртача күрсәткече 120 баллдан 44,17 баллга җиткән, бу 2019 ел белән чагыштырганда 8,44%-ка югарырак һәм, 2018 ел белән чагыштырганда, 33,35%-ка югары. Акыллы шәһәр технологияләрен гамәлгә кертү буенча иң нәтиҗәле чаралар эре һәм кече шәһәрләрдә теркәлгән. «Шәһәрләрнең IQ» тулы рейтингы РФ Төзелеш министрлыгы сайтында бастырылган.

Шулай ук укыгыз

Барлык яңалыклар