Казан Милли кунакханә премиясенең финалына чыкты

Татарстан башкаласы халык тавыш бирү нәтиҗәләре буенча Санкт-Петербургны 200 тавышка узып, беренчелеккә чыкты.

Фото: Денис Гордийко

(Казан шәһәре KZN.RU, 28-нче сентябрь, Алена Мирошниченко). Казан «Кунакханә бизнесын алып бару өчен иң яхшы шәһәр» номинациясендә Милли кунакханә премиясенең финалына чыкты. Татарстан башкаласы халык тавыш бирү нәтиҗәләре буенча Санкт-Петербургны 200 тавышка узып, беренчелеккә чыкты, дип сөйләде бүген Казан башкарма комитетында туризм үсеше комитеты директоры Дарья Санникова эшлекле дүшәмбедә.

Бүгенге көндә икенче йомгаклау этабы уза – шәһәрләрне профессиональ жюри бәяли. Җиңүчеләрне Мәскәүдә агымдагы елның октябрендә билгеләячәкләр. «2020 елгы милли кунакханә премиясе нәтиҗәләрен көтәбез. Күп кенә кунакханәләребез җиңүгә дәгъва итә ала», – дип белдерде Казан муниципаль берәмлеге башлыгының беренче урынбасары Денис Калинкин.

Моннан тыш, быел Казанның «Чүп-чарны бүлеп җыю» һәм «Челтәрдә иҗтимагый фикер алышулар» дип аталган ике проекты WeGo Халыкара Азия премиясендә катнашу өчен җибәрелде. Үз вакытында конкурс җиңүчеләре Сингапур, Гонконг, Питтсбург, Хельсинки булды. Казан беренче тапкыр бәйгенең зур финалына чыга алды. «Иң яхшы тотрыклы шәһәр» номинациясендә «Чүп-чарны бүлеп җыю» проекты тәкъдим ителде. Җиңүче иртәгә билгеле булачак», – диде Д.Санникова.