Казан беренче тапкыр футбол буенча Россия җыелма командасының «Безнең егетләр» фан-зонасын кабул итәчәк

«Ак Барс Арена»да Россия җыелма командасының Төркия командасына каршы матчының туры трансляциясен карау өчен мәһабәт экран урнаштырачаклар.

Фото: Казан шәһәре KZN.RU

(Казан шәһәре KZN.RU, 9-нчы октябрь). 11-нче октябрьдә «Ак Барс Арена» Казан стадионы беренче тапкыр футбол буенча Россия җыелма командасының «Безнең егетләр» фан-зонасын кабул итәчәк. Стадион касәсендә Россия җыелма командасы өчен хәлиткеч Милләтләр лигасының Төркия командасына каршы матчының туры трансляциясен карау өчен зур экран куелачак.

Җанатарлар өчен кызыклы программа әзерләнгән. Казанлылар үзләрен Беренче каналның спорт алып баручысы Виктор Гусев белән матч комментаторы ролендә сынап карый, Россия җыелма командасының элеккеге футболчылары Алексей Смертин һәм Дмитрий Сычевтан автографлар ала, Россия җыелмасы уенчылары автографлары белән майкалар һәм туплар ота алачак. Теләүчеләр шулай ук Россия җыелма командасы белән бергә телекүпердә катнаша алачак, ул Лев Яшин исемендәге «Динамо» стадионыннан оештырылачак.

Моннан тыш, матч алдыннан тамашачыларны «Братья Грим» төркеме онлайн-концерты һәм радио буенча йолдызлы кунаклар белән турыдан-туры элемтә көтә. Җанатарларны җылы чәй белән сыйлаячаклар.

«Ак Барс Арена»га керү ирекле булачак, барлык килүчеләргә санитар-эпидемиологик таләпләрне үтәргә һәм шәхси саклану чараларын - битлекләрне яки респираторларны кулланырга кирәк.

Матч 21.45 сәгатьтә, күңел ачу программасы 20.30 сәгатьтә башлана. Тамашачыларны 20.00 сәгатьтә кертә башлаячаклар, дип хәбәр итә ТР Спорт министрлыгы матбугат хезмәте.

Шулай ук укыгыз

Барлык яңалыклар