Казан кунакханә бизнесын алып бару өчен иң яхшы шәһәр булды

Бүләкне Туризмны үстерү комитеты директоры Дарья Санниковага РФ Дәүләт Думасы депутаты Сангаджи Тарбаев тапшырды.

Фото: Денис Гордийко

(Казан шәһәре KZN.RU, 26 нчы ноябрь). Казан миллион халык яшәүче шәһәрләр арасында кунакханә бизнесын алып бару өчен иң яхшы шәһәр булды. Кичә Мәскәүдә, Илкүләм кунакханә премиясенә йомгак ясаганда, ТР башкаласына шундый исем бирелде.

Ярышлар финалында 38 номинациядә җиңү өчен 159 катнашучы көч сынашты. «Кунакханә бизнесын алып бару өчен иң яхшы шәһәр (халык саны 1 млн артык)» категориясендә Казан һәм Волгоград тәкъдим ителде. Бу номинациядә бөтен илдән 10 катнашучы гариза биргән.

Премия җиңүчеләрен берничә этапта тавыш бирү юлы белән билгеләделәр: үз сайлауларын башта кулланучылар, аннары экспертлар һәм профессиональ жюри ясый алды. Быел катнашучыларны Россия кунакханә ассоциациясе президенты Геннадий Ламшин, Туризм буенча федераль агентлык җитәкчесе урынбасары Елена Лысенкова, Санкт-Петербург кече кунакханәләр ассоциациясе президенты Владимир Васильев, Санкт-Петербургның Туризмны үстерү комитеты рәисе урынбасары Нана Гвичия һәм туризм өлкәсенең башка экспертлары бәяләде.

Бүләкләү тантанасы Халыкара сәүдә үзәгендә узды. Туризмны үстерү комитеты директоры, шәһәр Думасы депутаты Дарья Санниковага бүләкне РФ Дәүләт Думасы депутаты Сангаджи Тарбаев тапшырды. Шулай ук чарада Казанның кунакханә өлкәсендә эшләүче вәкилләре дә катнашты. «Ногай» кунакханә комплексы «Өч йолдыз» категориясендә иң яхшы кунакханә исеменә лаек булды, дип хәбәр иттеләр Туризмны үстерү комитетында.

Илкүләм кунакханә премиясе Мәскәү һәм Санкт-Петербург Хөкүмәте, РФ Сәүдә-сәнәгать палатасы, Россия туриндустриясе берлеге ярдәме белән Россия кунакханә ассоциациясе тарафыннан оештырылды.

2020 һәм 2021 елларда Санкт-Петербург «Кунакханә бизнесын алып бару өчен иң яхшы шәһәр» исеменә лаек булган иде.

Шулай ук укыгыз

Барлык яңалыклар