Казан «Экояз – 2021» республика конкурсында җиңү яулады

ТР Хөкүмәте Йортында санитар-экологик икеайлык нәтиҗәләре ясалды

Фото: ТР Президенты матбугат хезмәте

(Казан шәһәре KZN.RU, 29-нчы май). Казан «Экояз – 2021» республика акциясендә җиңеп, «шәһәр округлары» категориясендә иң яхшысы булды. Бүген Татарстан Республикасы Хөкүмәте Йортында Татарстан Республикасы Президенты Рөстәм Миңнеханов үткәргән киңәшмәдә акция һәм тәмамланган санитар-экологик икеайлык нәтиҗәләрен ясадылар. Ул конкурста җиңү өчен бүләкне Казан муниципаль берәмлеге башлыгының беренче урынбасары Денис Калинкинга тапшырды. Видеоконференция элемтәсе режимында узган киңәшмәдә ТР Премьер-министры Алексей Песошин катнашты.

Быел «Экояз» бәйгесе ике этапта узды – район бәйгесе 1-нче апрельдән 14-нче майга кадәр, ә республика бәйгесе 15-нче майдан 31-нче майга кадәр. Санитар-экологик икеайлык нәтиҗәләре буенча иң яхшы күрсәткечләргә ирешкән муниципаль районнар бүләкләр белән билгеләп үтелде.

Киңәшмәдә санитар-экологик икеайлык нәтиҗәләрен ТР экология һәм табигый ресурслар министры Александр Шадриков ясады. Ул искә төшергәнчә, ике ай дәвамында муниципаль берәмлекләр, табигатьне саклау хезмәтләре, профильле министрлыклар һәм ведомстволар, предприятиеләр һәм оешмалар, битараф булмаган кешеләр санитар-экологик тәртип урнаштыру буенча эш алып барганн. Чараларда барысы 781 мең кеше катнашкан.

А.Шадриков сүзләренә караганда, ике айлык башыннан территорияләрне җыештыруда 21 мең берәмлектән артык техника җәлеп ителгән, полигоннарга 400 мең куб метрдан артык чүп чыгарылган, 700 меңнән артык агач һәм куак утыртылган, балалар мәйданчыклары, тукталыш павильоннары тәртипкә китерелгән.

22-нче майда Казанда ике айлык кысаларында Идел көненә багышланган «Россия суы» бөтенроссия акциясенең экомарафоны узды. «Бер үк вакытта ярларны Волгоград, Саратов, Түбән Новгород, Самарада чистарттылар. Акциягә 15 регион кушылды, – диде министр. – Бу көнне яр буе зоналарын 23 меңнән артык татарстанлы чистартты. Барлыгы республика буенча 1400 кубометр чүп-чар җыелды, 236 км яр буе территориясе тәртипкә китерелде». Татарстанда елга һәм күл ярларын чистарту буенча акцияләр дәвам итә, барлыгы меңнән артык чара планлаштырыла, дип өстәде спикер.

Күзәтчелек чаралары барышында белгечләр 3800-дән артык рөхсәтсез чүп ташлау урынын ачыклаган, шуларның 96%-ы бүгенге көндә бетерелгән. Административ җаваплылыкка 3 меңнән артык кеше тартылган. 13 млн 257 мең сумлык штраф санкцияләре салынган, дип хәбәр итә ТР Президенты матбугат хезмәте.

Исегезгә төшерәбез, Казанда ике айлык чорында гомумшәһәр өмәсе узды, анда 60 мең шәһәрле катнашты.

Фоторепортаж

Видеорепортаж