«Калашников. Солдат. Конструктор. Легенда»: Казан Кремлендә ату кораллары күргәзмәсе ачылачак

Экспозициядә 97 экспонат тәкъдим ителәчәк, алар арасында Мосин винтовкасы, үзе корыла торган Симонов карабины һәм АК-74М автоматы.

Фото: «Казан Кремле» музей-тыюлыгының матбугат хезмәте

(Казан шәһәре KZN.RU, 18 нче апрель). 25 нче апрельдә Казан Кремленең Гавами урыннары күргәзмә залларында М.Т.Калашников исемендәге ату коралы музей-күргәзмә комплексы фондларыннан «Калашников. Солдат. Конструктор. Легенда» күргәзмәсе ачылачак. Экспозициядә 97 экспонат тәкъдим ителәчәк, алар арасында 1891/1930 елгы тзелешле Мосин винтовкасы, 1945 елгы төзелешле үзе корыла торган Симонов карабины һәм АК-74М автоматы бар.

Михаил Калашников ату коралы тарихына АК-47 автоматын булдыручы буларак керә, ул корал дөньясында ХХ гасыр легендасына әверелә. Күргәзмәдә кунаклар Бөек Ватан сугышы чорындагы совет ату коралын, 1940-1970 еллар ахырында конструктор тарафыннан эшләнгән автомат коралның серияле һәм тәҗрибә үрнәкләрен, гражданлык, спорт һәм ау коралларын, шулай ук 1991 елдан соң Калашников системасы базасында төзелгән автоматларны һәм пистолет-пулеметларны күрәчәк.

Экспозициядә шулай ук конструкторның шәхси коллекциясеннән әйберләр, бүләкләр, XX-XXI гасырлар фотодокументларының төп нөсхәләре булачак. Күргәзмәне киң аудиовизуаль контент һәм интерактив биремнәр белән мультимедия комплекслары тулыландырачак.

Күргәзмә 24 нче апрельдә 15:00 сәгатьтә ачылачак. Кунаклар өчен ул 25 нче апрельдән эшли башлаячак: сишәмбе-пәнҗешәмбе, шимбә-якшәмбе – 10:00 дән 18:00гә кадәр, җомга – 11:00дән 20:00гә кадәр, дип хәбәр итә музей-тыюлыкның матбугат хезмәте.

Шулай ук укыгыз

Барлык яңалыклар