Сентябрьгә Казанда Тунаков урамындагы 126 номерлы балалар бакчасы бинасына капиталь ремонт ясалачак

Шәһәр Мэры Илсур Метшин мәктәпкәчә белем бирү учреждениесендә эш барышы белән танышты.

Фото: Марат Мугинов

(Казан шәһәре KZN.RU, 16-нчы июль, Камилә Гобәйдуллина). Уку елы башына Казанның Мәскәү районында Тунаков урамы, 53а адресы буенча капиталь ремонттан соң 126-нчы номерлы балалар бакчасы ачылачак. Бинадагы эшләрнең барышы белән шәһәр Мэры Илсур Метшин танышты.

«Быел капиталь ремонт программасы буенча 15 мәктәпкәчә учреждение яңартыла. Димәк, 2 мең бала тәрбияләнә торган шартлар яхшырачак. Аларның яңартылган төркемнәре, ашханәләре, медицина кабинетлары һәм, әлбәттә инде, йөреп кайту мәйданчыклары барлыкка киләчәк, – дип билгеләп үтте шәһәр башлыгы. – 2010 елдан бирле инде без 66 балалар бакчасын ремонтладык, әмма әле бик күп эшләр башкарасы бар, кечкенә казанлылар өчен шартлар тудыру бик мөһим, – дип билгеләде Мэр.

Татар телендә белем бирүче 126-нчы номерлы катнаш төрдәге балалар бакчасы ике бинада – Восстание урамы, 44а һәм Тунаков урамы, 53а адреслары буенча урнашкан. Икенчесе 1943 елда әсирлектә булган немецлар тарафыннан төзелгән. Элек балалар бакчасы Казан моторлар төзү җитештерү берләшмәсе карамагында булган, хәзер муниципалитет балансында тора.

Капиталь ремонттан соң, элеккеге кебек үк, бу ике катлы бинада 455,2 кв.м мәйданлы 3 төркем эшләячәк, проект буенча бина 60 тәрбияләнүчегә исәпләнгән. Яңартылган балалар бакчасында полилингвальлык принцибы гамәлгә ашырылачак.

Бүгенгә капиталь ремонт 25%-ка үтәлгән. Хәзер төзүчеләр монтаж эшләре, түбәне сүтү, идәннәргә бетон салу һәм фасадны җылыту белән шөгыльләнә. Эшләр вакытында искергән коммуникацияләр алыштырылачак һәм начар вентиляция проблемасы хәл ителәчәк. Киров һәм Мәскәү районнары администрациясе башлыгының беренче урынбасары Илсур Хисмәтуллин хәбәр иткәнчә, балалар бакчасы территориясен дә төзекләндерү күздә тотыла – барлыгы 3 мәйданчык булачак, элмәләр барлыкка киләчәк.

Объектны агымдагы елның сентябрендә тапшыру планлаштырыла. Бинаны капиталь төзекләндерүгә 47,3 млн сумга якын акча бүленгән.

Эш барышы белән шулай ук Казанның Мәгариф идарәсе башлыгы Ирек Ризванов һәм шәһәрнең социаль өлкә учреждениеләрен карап тоту һәм аларга хезмәт күрсәтү департаменты директоры Петр Королев танышты.

Исегезгә төшерәбез, Казанның балалар бакчаларына 76 мең бала йөри, шул исәптән яшь ярымнан өч яшькә кадәрге 4020 бала. Мәктәпкәчә белем бирү программасы 325 белем бирү учреждениесендә гамәлгә ашырыла: 312 балалар бакчасы, 2 прогимназия, 10 мәктәпкәчә белем бирү мәктәбе һәм Дәвалау педагогикасы үзәгендә. Мәскәү районында 40 балалар бакчасына 7750 бала йөри.