Татар галиме Каюм Насыйриның тууына 200 ел тулуга «Россия Почтасы» конверт чыгарды

Тираж 50 мең экземпляр тәшкил итә

«Россия почтасы» XIX гасыр татар галиме, әдәбиятчысы һәм мәгърифәтчесе Каюм Насыйрига багышланган уникаль конверт чыгарды. Быел республика тарихчының тууына 200 ел тулуны билгеләп үтә.

Конвертта Каюм Насыйриның портретын һәм гомер елларын, шулай ук «Татарстан Республикасы» дигән язуны күрергә була. Конвертның стандарт почта маркасы бар, аның бәясе Россия буенча җибәрү тарифына туры килә.

«Күренекле татар галиме-энциклопедисты, тарихчысы, этнографы, әдәбиятчысы Һәм тел белгече Каюм Насыйриның 200 еллыгы уңаеннан аның юбилеена почта конверты чыгарылуын аңлау күңелле. Шуның нәтиҗәсендә аның тормышы һәм фәнгә һәм үз халкына хезмәт итүе турында республикабызда гына түгел, аннан читтә яшәүче тагын да күбрәк кеше беләчәк», – дип билгеләп үтте «Россия Почтасы» төбәк идарәсе директоры Илнур Мәхмүтов.

Конвертларның тиражы – 50 мең данә. Аларны Казан һәм Татарстан почта бүлекчәләрендә сатып алырга мөмкин, дип хәбәр иттеләр «Россия Почтасы»АҖ матбугат хезмәтендә.

Шулай ук укыгыз

Барлык яңалыклар