Татарстанда янгын куркынычы аркасында урманнарда булуга чикләүләр кертелде

90% очракта урман янгыннарының килеп чыгу сәбәбе – кеше факторы.

Фото: Казан шәһәре KZN.RU

(Казан шәһәре KZN.RU, 16-нчы июнь). Бүгенге көннән Татарстанда янгын куркынычы югары булу сәбәпле, гражданнарның урманнарда булуына чикләү кертелде.

21 көн дәвамында урманнарда йөрү генә түгел, ә аларның территорияләренә транспорт чараларында керү, эшләр башкару да тыела. Урманнарны гамәлдәге законнар нигезендә эшләү өчен куллана торган кешеләр өчен гомуми файдаланудагы юллар буенча үтәли йөрү искәрмә булып тора.

Якын арада Татарстанның урман тармагы белгечләре чикләү кертү турында кисәтү аншлаглары урнаштырачак һәм урман юлларын шлагбаумнар белән ябачак. Моннан тыш, ведомство буйсынуындагы учреждениеләр тарафыннан тәүлек буе кизү тору, патрульлек итү көчәйде, ял көннәрендә массакүләм булу урыннарында вакытлы постлар оештырылды, дип хәбәр итте ТР Урман хуҗалыгы министрлыгының урман фондын саклау һәм яклау секторы мөдире Алексей Мосунов. Янгын сүндерү көчләре һәм чаралары әзер хәлдә.

Искәртеп узабыз, Татарстанда янгын куркынычсызлыгын II типтагы 20 урман янгыннары станциясе һәм III типтагы 5 урман янгыннары станциясе тәэмин итә. Урманнардагы янгын куркынычы буенча космик, авиация һәм җир өсте мониторингы алып барыла, урманнарны янгынга каршы төзекләндерү буенча чаралар комплексы үткәрелә.

Статистик мәгълүматларга караганда, 90% очракта урман янгыннарының килеп чыгуның төп сәбәбе янгын куркынычсызлыгы кагыйдәләрен бозу һәм ут белән саксыз эш итү, дип хәбәр итә ТР Урман хуҗалыгы министрлыгы матбугат хезмәте.

Урманда яки урман массивлары янында янгын чыккан очракта, кичекмәстән түбәндәге телефоннарга хәбәр итәргә кирәк: +7(800)100-94-00, +7(843)221-37-95.

Шулай ук укыгыз

Барлык яңалыклар