Илсур Метшин «Казаныш» архитектура форумын ел саен уздыру карары турында белдерде

Ә ел дәвамында, аның фикеренчә, төзелеш индустриясе вәкилләре өчен укыту буенча очрашулар оештырырга кирәк.

Фото: Марат Мугинов

(Казан шәһәре KZN.RU, 6-нчы декабрь, Ксения Швецова). Узган атнада булган «Казаныш» Бөтенроссия архитектура-төзелеш форумы ел саен үткәрелә торган чара булачак. Бу хакта бүген эшлекле дүшәмбедә Казан Мэры Илсур Метшин хәбәр итте.

Шәһәр башлыгы форумда бөтен илдән архитектура һәм төзелеш өлкәсендә танылган белгечләрне җыйган барлык оештыручыларга һәм катнашучыларга рәхмәт белдерде. «Иң мөһиме, безнең иң эре төзүчеләребез, девелоперларыбыз уңайлыкка карата булган фикерләрне ишетә, – дип билгеләп үтте И.Метшин. – Казан, Татарстан девелоперлары, төзүчеләре, архитекторлары бик күп иде. Безне яшь – сәхнәгә төрле номинацияләрдә бүләкләр алырга чыккан 30 яшьтән 40 яшькә кадәрге белгечләр бик шатландырды. Бу яшьтә инде алар чын профессионаллар, без аларның объектлары белән яхшы таныш».

Форум тармак вәкилләренә тәҗрибәләре белән уртаклашырга һәм төзелеш индустриясен үстерергә мөмкинлек бирә, дип саный Мэр. «Дөнья архитектурасының иң яхшы тенденцияләре белән бергә үсүне дәвам итү бик мөһим, – диде ул. – Бүген бу юнәлештә тонны Мәскәү бирә, Мәскәү Мэры Сергей Собянин, Марат Хөснуллин (РФ Хөкүмәте рәисе урынбасары - мөх.шәр.) бу шәһәрнең төзелеш комплексы өчен бик күп нәрсә эшләделәр. Шуңа күрә ерак барырга кирәкми, барлык соңгы тенденцияләр безнең ил башкаласында тәкъдим ителгән».

«Казаныш» форумы, шәһәрдә беренче тапкыр уңышлы узган, хәзер ел саен булачак. Моннан тыш, елга берничә тапкыр төзелеш индустриясе вәкилләре катнашында өйрәтү очрашулары уздырырга кирәк, дип саный Мэр. «Елына ике-өч тапкыр девелоперлар, архитекторлар, фән вәкилләре катнашында укыту чаралар үткәрелергә тиеш. Бу бездә иң амбициоз проектларны гамәлгә ашыру максатларында белемне арттыру өчен кирәк», – диде шәһәр башлыгы.

Заманча торак комплекслары яңа дәрәҗәдә төзелә, аларның инфраструктурасы шәһәр кешеләренең барлык ихтыяҗларын исәпкә ала, дип өстәде И.Метшин: «Бу тенденцияне дәвам итү бик мөһим, трендта булырга кирәк, булачак яңа фатир хуҗаларының уңайлы тормышы хакына иң яхшы нәрсәләрне таләп итәргә кирәк».

Исегезгә төшерәбез, «Казаныш» форумы Казанда 1-3-нче декабрь көннәрендә узды. Форумның төп бурычы – архитектура-төзелеш командалары арасында танышу һәм тәҗрибә белән уртаклашу, иң мөһим проектларны һәм казанышларны тәкъдир итү. Чарада 60 команда катнашты – бу Мәскәү, Санкт-Петербург, Казан, Екатеринбург, Киров, Новосибирск, Ростов-на-Дону, Ярославль һәм Россиянең башка шәһәрләреннән килгән архитекторлар. Форумның соңгы көнендә шәһәрнең иң яхшы объектына смотр-конкурска нәтиҗәләр ясалды.