Илсур Метшин Иркутск һәм Ялта мэрлары белән хезмәттәшлек турында килешүгә кул куйды

Шәһәрләр муниципаль программаларны гамәлгә ашыру һәм шәһәр хуҗалыгы өлкәләрендә заманча технологияләр кертү тәҗрибәсе белән уртаклашачак

Фото: Марат Мөгыйнов

(Казан шәһәре KZN.RU, 8 нче сентябрь, Юлия Летникова). Казан Мэры Илсур Метшин Иркутск һәм Ялта мэрлары Руслан Болотов һәм Янина Павленко белән хезмәттәшлек турында килешү имзалады. Тантана «Казан-Экспо» халыкара күргәзмәләр залында «РОСТКИ: Россия-Кытай: үзара файдалы хезмәттәшлек» бизнес-форумында узды.

Мәсәлән, Казан, Иркутск һәм Ялта шәһәр халкы мәнфәгатьләрендә дуслыкны үстерүгә һәм ныгытуга ярдәм итүче чараларны бергәләп үткәрергә килештеләр. Шулай ук яклар муниципаль идарә системасы үсеше һәм шәһәрләрнең социаль-икътисади үсеше турында мәгълүмат алмашачак, муниципаль программаларны гамәлгә ашыру һәм шәһәр хуҗалыгы өлкәләрендә заманча технологияләр кертү тәҗрибәсе белән уртаклашачак.

Моннан тыш, яклар мәгариф, сәламәтлек саклау, халыкны социаль яклау һәм мәшгульлек, әйләнә-тирә мохитне саклау, мәдәният, спорт, яшьләр сәясәте һәм туризм өлкәсендә элемтәләр үстерергә планлаштыралар.

Хезмәттәшлек турында килешү шәһәр хуҗалыгы өлкәләрендә җирле әһәмияттәге мәсьәләләрне хәл итү буенча иң яхшы муниципаль практикаларны өйрәнү өчен делегацияләр алмашуны да күздә тота.

Иркутск һәм Ялта мэрлары да үзара хезмәттәшлек турында килешүләр имзаладылар.

Бизнес-форум Казанда 7 нче һәм 8 нче сентябрьдә уза. Чара программасы 40 тан артык эшлекле сессияне үз эченә ала. Металл эшкәртү, эретеп ябыштыру, станок һәм автомобиль төзелеше буенча ике зур күргәзмә әзерләнгән, анда Кытай автопромының 30 дан артык моделе тәкъдим ителгән.

Чараның бер өлеше булып мәдәни чаралар да тора: Нобель премиясе лауреаты Мо Янь әсәре буенча Кытай-Россия актерлар төркеменең драматик постановкасын күрсәтү, Россия-Кытай дуслыгы яшьләр фестивале, Кытайның борынгы вэйци уены буенча турнир, Кытай киносы фестивале, шахмат турниры һ.б.