Илсур Метшин Россия Федерациясе Президентының Мактау грамотасы белән бүләкләнде

Бүләкне Казан Мэрына Татарстан Президенты Рөстәм Миңнеханов тапшырды.

Фото: Марат Мөгыйнов

(Казан шәһәре KZN.RU, 10 нчы июнь). Россия көне алдыннан Казан Кремлендә Дәүләт бүләкләре тапшыру тантанасы узды. Республика Президенты Рөстәм Миңнеханов Казан Мэры Илсур Метшинны иҗтимагый әһәмиятле чараларны әзерләүгә һәм уздыруга керткән өлеше өчен Россия Федерациясе Президентының Мактау грамотасы белән бүләкләнде.

«Без меңьеллык тарихы һәм бай мәдәни мирасы булган илдә яшәвебез һәм эшләвебез белән горурланабыз. Күп буыннарның нәтиҗәле хезмәте, федераль үзәк һәм Россия Президенты ярдәме белән безнең республика илнең алдынгы, үрнәк төбәге булып тора», – дип ассызыклады Р.Миңнеханов.

Республика башлыгы билгеләп үткәнчә, Татарстан гражданнарның тормышын яхшырту, көчле Россия төзелеше юнәлешендә эзлекле рәвештә эш алып бара. «Үз эшләре белән мавыгучы, шул исәптән әлеге залда утыручы кешеләрнең энергиясе һәм таланты нәтиҗәсендә икътисад, фән, мәгариф, медицина, мәдәният, идарә һәм башка мөһим тармаклардагы иң кыю идеяләр тормышка ашырыла», – диде Р.Миңнеханов.

Дәүләт бүләкләре лауреатларына мөрәҗәгать итеп, Р.Миңнеханов аларның илнең социаль-икътисади үсешенә керткән өлеше бәяләп бетергесез, дәүләт алдында торган җитди каршылыкларны уңышлы хәл итәләр, дип билгеләп үтте. «Сезнең талантыгыз һәм хезмәт сөючәнлегегез, чыдамлыгыгыз һәм батырлыгыгыз республиканы көчле һәм алдынгы итә. Сезнең барыгызны да лаеклы бүләкләрегез белән котлыйсым килә, үз эшегезгә тугрылыклы булуыгыз, шулай ук туган республикабыз һәм Россия үсешенә керткән өлешегез өчен рәхмәт сезгә», – дип хәбәр итә ТР Президенты матбугат хезмәте.