Илсур Метшин Россия президентының Идел буе федераль округындагы тулы вәкаләтле вәкиленең рәхмәт хаты белән бүләкләнде

Шәһәр мэрына бүләк күпьеллык намуслы хезмәте, югары һөнәри осталыгы һәм вазифаи бурычларын үрнәк дәрәҗәдә башкарганы өчен тапшырылды

Фото: Марат Мөгыйнов

Казан мэры Илсур Метшин күпьеллык намуслы хезмәте, югары һөнәри осталыгы һәм вазифаи бурычларын үрнәк дәрәҗәдә башкарганы өчен Россия президентының Идел буе федераль округындагы тулы вәкаләтле вәкиле Игорь Комаровның рәхмәт хаты белән бүләкләнде. Шәһәр башлыгына бүләкне эшлекле дүшәмбедә Татарстан буенча баш федераль инспектор Виктор Демидов тапшырды.

«Бүген Казан мэриясендә булу һәм, җитәкчем – Россия президентының Идел буе федераль округындагы тулы вәкаләтле вәкиле Игорь Комаров йөкләмәсен үтәп, хөрмәтле Илсур Рәис улына ведомство бүләген тапшыру минем өчен зур дәрәҗә. Әлеге югары миссияне сөенеп һәм зур җаваплылык белән башкарам», – дип ассызыклады Виктор Демидов.

ТР буенча баш федераль инспектор билгеләп үткәнчә, мэр тарафыннан системалы эш алып барылу нәтиҗәсендә Казан елдан-ел үсә һәм үзгәрә.

«Илсур Рәис улы, Сезнең авыр, фундаменталь һәм үтә дә нәтиҗәле эшчәнлегегез безнең яраткан Казаныбызны елдан-ел матуррак итә. Бу изге миссия өчен рәхмәт», – диде ул.

Үз чиратында Илсур Метшин Башкарма комитет коллективына Казанның иминлеге хакына башкарган уртак хезмәт өчен рәхмәт белдерде. «Бүләкне сезнең белән уртаклашам. Без, нәрсә генә эшләсәк тә, бергә эшлибез», – диде мэр.

Диләрә Гафурова