И. Метшин: «Тыныч вакытта булган куркыныч фаҗига белән килешү кыен»

Казан Мэры шәһәрнең Совет районындагы 175-нче номерлы гимназия диварлары янындагы стихияле мемориалга чәчәкләр салды.

Фото: Марат Мугинов

(Казан шәһәре KZN.RU, 12-нче май, Алинә Бережная). Казан Мэры Илсур Метшин бүген Совет районының 175-нче номерлы гимназиясе диварлары янындагы стихияле мемориалга чәчәкләр салды. Фаҗига урынына шәһәр башлыгы кичерелгән операциядән соң килде. «Тыныч вакытта булган коточкыч фаҗига белән килешүе кыен. Кояшлы көндә әти-әниләр балаларын югалтты, укытучылар һәлак булды. Без барлык туганнарының, якыннарының кайгысын уртаклашырга телибез», – диде Илсур Метшин.

Казан Мэры зыян күрүчеләргә тизрәк савыгуларын теләде. «Без хәзер хастаханәләрдә булган балаларны һәм өлкәннәрне коткару өчен барысын да эшләячәкбез. Бүген бөтен ил буйлап һәм аннан читтә мондый мемориаллар оештырылган - кешеләр чәчәкләр, уенчыклар алып килә, гаиләләрнең кайгысын уртаклашып, үз йөрәкләренең бер өлешен тапшыра», – дип дәвам итте шәһәр башлыгы.

И.Метшин педагоглар коллективына экстремаль шартларда оешкан гамәлләре өчен рәхмәт белдерде. «Аерым рәхмәт сүзләре – мәктәп директорына һәм укытучылар коллективына, алар балаларның тормышын саклап калу өчен барысын да эшләде. Бу коточкыч хәл. Без югалту кайгысын уртаклашабыз. Мәңгелек хәтер аларга», – диде шәһәр башлыгы.

Икенче тәүлек Казанлылар һәлак булган балаларны һәм укытучыларны искә алу өчен күпләп 175 нче гимназия янына киләләр. Кешеләр гаиләләре белән чәчәкләр, уенчыклар, конфетлар һәм шәмнәр куя.

Искәртеп узабыз, 175-нче гимназиядә фаҗига 11-нче майда булды. Атыш нәтиҗәсендә 9 кеше һәлак булды – 7 бала һәм ике өлкән кеше, 23 кеше хастаханәгә озатылды. Бүген Россия Гадәттән тыш хәлләр министрлыгының Ил-76 самолеты Казан аэропортыннан очып чыкты һәм Мәскәүдә төште. Бортта 8 зыян күрүче, алар арасында өч өлкән һәм биш бала. Башкалада аларга кирәкле медицина ярдәме күрсәтеләчәк.