И.Метшин: «Табибларга җәмәгать транспортында бушлай йөрүне тәэмин итү - эшләре өчен рәхмәтебезне белдерү ысулы»

Казанда медицина хезмәткәрләренә һәм волонтерларга барлык транспорт төрләренә 5 мең 870 лимитсыз юл билетлары бирелгән.

(Казан шәһәре KZN.RU, 6-нчы апрель, Ксения Швецова). Казанда медицина хезмәткәрләренә һәм волонтерларга барлык транспорт төрләренә 5 мең 870 лимитсыз юл билетлары бирелгән. Бу ярдәм чарасы медицина учреждениеләре хезмәткәрләренең көчәйтелгән режимда эшләве чорында бик мөһим, дип билгеләп үтте бүген Казан Мэры Илсур Метшин коронавирус инфекциясе таралуга каршы тору буенча шәһәр штабы утырышында. Электрон юл билеты ресурсын тулыландырган, әмма апрельдә җәмәгать транспортында бер генә сәфәр дә эшләмәгән шәһәр халкының ташламалы категориясе транспорт картасында акчаларны киләсе айга - май аена күчерә алачак.

Лимитсыз юл билетларының 5 мең 699-ын медицина хезмәткәрләре алды, дип хәбәр итте ТР Сәламәтлек саклау министрлыгының Казан буенча идарәсе башлыгы урынбасары Гөлнара Гайфуллина. «Шәһәрнең медицина хезмәткәрләре исеменнән бу чара өчен аерым рәхмәт. Юл йөрү ихтыяҗы таләп ителгән ихтыяҗны тулысынча каплый», - диде ул.

«Җәмәгать транспортында табиблар өчен бушлай йөрү мөмкинлеге - бу аларның эше өчен безнең гомуми рәхмәтебезне белдерү ысулы, - диде Казан Мэры Илсур Метшин. - Бүген табиблар кабинетларда утырмый диярлек, пациентларга чакыруларга күп йөриләр. Монда безгә партнерларыбыз - «Яндекс.Такси» да ярдәм итә, алар табиблар өчен автомобильләр бүлеп бирде. Медицина хезмәткәрләренең эше бермә-бер артты, шуңа күрә без аларга ярдәм итәчәкбез».

Исегезгә төшерәбез, «Яндекс.Такси» компаниясе Казанның ашыгыч медицина ярдәме өчен 30 машина бирде, бу медицина бригадаларына йөкләнешне берничә тапкырга киметергә мөмкинлек бирде.

Лимитсыз юл билетлары ай ахырына кадәр гамәлдә булачак, дип хәбәр итте Башкарма комитет җитәкчесе урынбасары Илдар Шакиров. Ул шулай ук электрон юл билетының ресурсын тулыландырган, әмма килеп туган шартлар аркасында апрель аенда җәмәгать транспортында бер генә сәфәр дә кылмаган шәһәр халкының ташламалы категориясе транспорт картасындагы акчаны киләсе айга күчерә алачак, диде.