И.Метшин Бөек Ватан сугышы ветераннары турында: «Нинди генә исемнәр бирсәк тә, нинди генә бүләкләр тапшырсак та, алар безнең сезгә булган хөрмәт хисләрен чагылдырып бетерә алмас»

Казан шәһәре Думасы сессиясендә Ватанны саклаучылар елына һәм Бөек Ватан сугышында Җиңүнең 80 еллыгына йомгак ясалды

Денис Гордийко фотосы

Казанда Ватанны саклаучылар елына һәм Бөек Ватан сугышында Җиңүнең 80 еллыгына йомгак ясалды. Казан шәһәре Думасының VII сессиясе барышында истәлекле зур акцияләрне һәм социаль проектларны гамәлгә ашыру турында Башкарма комитет җитәкчесе урынбасары Азат Абзалов сөйләде.

Фронтовикларның казанышларын тану узган елның төп вакыйгасы буларак билгеле: 59 Бөек Ватан сугышы ветеранына «Казанның Мактаулы гражданины» исеме бирелгән.

«Ватанны саклаучылар елы Казан өчен календарь елы гына түгел. Ул тарихыбызны тирәннән аңлау, Ватаныбызны саклаган, саклавын дәвам итүче кешеләргә карата җаваплылык тою һәм рәхмәт белдерү вакытына әйләнде. Казан һәрвакыт көчле рухлы кешеләр шәһәре булды һәм шулай булып кала да. Монда батырлыкны хөрмәт итәләр, монда тынычлыкның кадерен беләләр. Узган ел без йөзләгән чара, очрашулар, батырлык дәресләре, патриотик акцияләр уздырдык. Әмма иң мөһиме – буыннар арасындагы бәйләнеш, аларның үзара аралашуы, сугыш сынауларын узганнарга рәхмәт сүзләрен җиткерү мөмкинлеге, – диде Казан мэры Илсур Метшин. – Ветераннарыбызга аерым рәхмәт сүзләре. Сезнең батырлыгыгыз – ул безнең бүгенгебез һәм якты киләчәгебез. Сез – чын ватанпәрвәрлек, ныклык һәм Ватанга мәхәббәт үрнәге. Мактаулы гражданин исемен бирү ул чын күңелдән рәхмәтебезне белдереп эшли алган бик кечкенә эшебез. Нинди генә исемнәр бирсәк тә, нинди генә бүләкләр тапшырсак та, алар безнең сезгә булган хөрмәт хисләрен чагылдырып бетерә алмас».

Каһарманнар исемен мәңгеләштерү буенча да зур эш башкарылган. 2025 елда Җиңү паркында моңа кадәр куелмаган истәлек такталары белән тулыландырылып, Геройлар пантеоны яңартылган. Моннан тыш, паркта фронтовик шагыйрь Фатыйх Кәримгә һәйкәл һәм Россия Герое Дамир Гыйлемхановка бюст куелган, шулай ук Казан урамнарына исемнәре бирелгән Бөек Ватан сугышы геройлары хөрмәтенә яңартылган мемориаль стела ачылган.

Шәһәр һәм республика көненә армия генералы, Совет һәм Россия хәрби җитәкчесе Мәхмүт Гәрәевка бюст һәм совет очучысы-сынаучысы Георгий Мосоловка мемориаль такта куелган. Ватан Геройлары көнендә Эчке эшләр органнары ветераннары Борис Ботов, Федор Горшков һәм Валентин Шихобалов хөрмәтенә мемориаль такта ачылган.

Башкалада Җиңүнең 80 еллыгы зурлап бәйрәм ителгән. 9 майда Казан урамнарында хәрби техника катнашында парад узган, Җиңү паркында тантаналы чәчәкләр салу чарасы оештырылган. Ике елдан соң беренче тапкыр урынга килеп уздырылган «Үлемсез полк» чарасында 150 меңгә якын шәһәр кешесе катнашкан.