И.Гыйниятуллин: «ТКХ өчен түләү һәм бурычларны бетерү – гражданнарның турыдан-туры бурычы, һәм мин моңа өндим»

Казанда халыкның ТКХ өчен бурычлары 1 млрд сумга якын тәшкил итә

Казанда торак-коммуналь хезмәтләр өчен халыкның суммар бурычлары идарәче компанияләрнең ресурслар белән тәэмин итүче оешмалар алдындагы бурычларыннан күп тапкыр артык. Бүгенге көндә халыкның ИК алдындагы бурычы 1 млрд сумга якын тәшкил итә. ИКнең акчалары алынып бетмәгәнлектән, тиешле күләмдә персонал яллау һәм лаеклы хезмәт хакы белән тәэмин итү мөмкинлеге юк. Әйтик, 2,2 мең хезмәткәргә билгеләнгән норматив буенча, ИК штатында бары тик 1453 урам себерүче генә исәпләнә. Шул ук вакытта кыш башында йөкләнеш арту белән эшче куллар саны тагын 20% ка кадәр кимергә мөмкин. Бу хакта бүген шәһәр Башкарма комитетында аппарат киңәшмәсендә Башкарма комитет җитәкчесе урынбасары Искәндәр Гыйниятуллин хәбәр итте.

Ишегалларын киң колачлы төзекләндерү дә хәлне катлауландыра. Яңа, еш кына кыйммәтле җиһазлар һәм катлаулы ландшафтлар кардан чистарту процессын катлауландыра. Моннан тыш, йорт яны территорияләрен җыештырган өчен гамәлдәге тарифларда еш кына аны чыгаруга акча каралмаган, бу исә идарәче компанияләргә өстәмә финанс йөкләмәсе тудыра.

Шуңа бәйле рәвештә идарәче компанияләр халыкны инициатива күрсәтергә һәм идарәче компания белән берлектә кар чыгаруны оештыру буенча чишелешләр эзләргә чакыра. Әмма, спикер ассызыклаганча, иң мөһиме һәм беренче чираттагысы – торак-коммуналь хезмәтләр өчен вакытында түләү. Казан ишегалларындагы чисталык, тәртип һәм уңайлылык, бигрәк тә кышкы катлаулы чорда, һәр кешенең намуслылыгына турыдан-туры бәйле бит.

«Бу акчалар бездә персонал җитмәү хисабына җыела, – дип ассызыклады Искәндәр Гыйниятуллин, шәһәр халкына мөрәҗәгать итеп. – ТКХ өчен түләү һәм бурычларны бетерү – гражданнарның турыдан-туры бурычы, һәм мин моңа өндим. Халык әзер булырга һәм бу хәлгә төшенергә, сораулар куярга гына түгел, ИК белән бергә аларга җавап эзләргә дә сәләтле булырга тиеш».

Идарәче компанияләр контролендә 4,2 меңнән артык күпфатирлы йорт тора, аларның йорт яны территорияләренең гомуми мәйданы 22 млн квадрат метрдан артып китә.