Дәүләт автоинспекциясе казанлыларны юлларда балаларның иминлеген күзәтергә чакыра

Кышкы чорда кыска көн һәм һава торышы юл-транспорт һәлакәтләре куркынычын арттыра.

Фото: Денис Гордийко

(Казан шәһәре KZN.RU, 17 нче гыйнвар). Дәүләт автоинспекциясе казанлыларны юлларда балаларның иминлеген күзәтергә чакыра. Кыш көне юл-транспорт һәлакәтләре куркынычын кыска көн, яңгыр, боз, салкын яки кискен температураның үзгәрүе арттыра. Фаҗигаләрдән саклану өчен өлкәннәргә яшь җәяүлеләрнең киеменә яктылык кайтаручы элементларны беркетергә һәм урамга чыгар алдыннан балаларга юл йөрү кагыйдәләре турында искәртергә киңәш итәләр.

ЮХИДИ матбугат хезмәте мәгълүматлары буенча, алдагы көнне балалар белән берничә юл-транспорт һәлакәте булган. Аерым алганда, Дементьев урамындагы 1/1 нче номерлы йорт каршында 55 яшьлек КамАЗ йөртүчесе, светофорның тыю сигналына чыгып, 17 яшьлек казанлыны бәрдерә. Ул көйләнелә торган җәяүлеләр кичүе буенча юлны чыккан була. Медицина ярдәме күрсәтелгәннән соң, егетне хастаханәдән чыгаралар. Шулай ук 16 нчы гыйнварда Гагарин урамындагы 73а йорт каршында 59 яшьлек ГАЗ-2747 автомобиле йөртүчесе юл бирмәгән һәм җәяүлеләр кичүе буенча юлны чыгучы 8 яшьлек укучыны бәрдергән. Баланы хастаханәгә төрле тән җәрәхәтләре белән китергәннәр.

ЮХИДИ шулай ук чана, тюбинг, сноуборд һәм чаңгы шуу өчен билгеләнгән урыннарда гына шуарга яравын искә төшерә. Дәүләт автоинспекциясе хезмәткәрләре әлеге кагыйдәләрнең үтәлешен даими контрольдә тота, карлы тауларны һәм бозлы катламнарны тикшерә һәм юлга шуып чыгу мөмкинлеге булган урыннарны оператив рәвештә бетерә.

Яшь казанлыларның иминлеге өчен шулай ук балаларны автомобиль салонында йөртү кагыйдәләрен дә үтәргә кирәк. Балигъ булмаган балаларны йөртүчеләргә тизлек режимын үтәргә,
куркынычсызлык каешларын һәм балалар җайланмаларын кулланырга, куркыныч маневрларны кулланмаска һәм акрын йөртү стилен сакларга кирәк. Һава шартлары начар булу сәбәпле, юл вәзгыяте катлауланган очракта, сәфәрләрне кичектерергә киңәш ителә, бигрәк тә ерак араларга.

Шулай ук укыгыз

Барлык яңалыклар