ТР баш токсикологы: «Алкоголь куллануның оптималь дозасы юк, ул нинди очракта да бөтен организм өчен зыянлы»

Табиблар казанлыларны спиртлы эчемлекләр куллану һәм сыйфатсыз продукция сатып алу куркынычы турында кисәтә.

Фото: Марат Мугинов

(Казан шәһәре KZN.RU, 22-нче декабрь, Алинә Бережная). Бәйрәм көннәрендә Казанда алкоголь белән агуланган пациентлар саны 3-4 тапкырга арта. Спиртлы эчемлекләрне чамадан тыш куллану организмдагы үзгәрешләргә - баш әйләнүгә, косуга, йөрәкнең еш тибүенә, ә кайвакыт үлемгә китерә. Табиблар раславынча, алкогольнең организм өчен куркынычсыз дозасы юк. Үзеңне ничек саклап калу һәм алкоголь белән агуланучы пациентлар сафларын тулыландырмау турында «Татар-информ» мәгълүмат агентлыгында узган матбугат конференциясендә сөйләделәр.

Алкоголь белән агулануның иң киң таралган сәбәпләренең берсе - эчкән эчемлек күләме өстеннән контрольне югалту. «Барысына да билгеле, алкоголь организм өчен агулы. Еш кына кешеләр күпме эчкәннәрен контрольдә тота алмыйлар һәм организмны агулануга кадәр җиткерәләр. Әгәр әз күләмдә эйфория булса, зурысында – көзән җыеру, баш әйләнү һәм башка нәтиҗәләр», – дип сөйләде Татарстан Республикасы Сәламәтлек саклау министрлыгының баш наркологы Резеда Хаева. Аның сүзләренчә, алкоголь интоксикациясе хроник авыруларның кискенләшүенә сәбәп булырга мөмкин, ә спиртлы эчемлекләрне озак куллану инсультларга һәм инфарктларга китерә. «Алкоголь йогынты ясамаган орган юк. Бу токсинлы агу, ул һәрвакыт организмда үзгәрешләргә китерә», – дип ассызыклады Резеда Хаева.

Этил спирты аз күләмдә булган эчемлекләр аеруча куркыныч, дип билгеләп үтә ТР Сәламәтлек саклау министрлыгының баш токсикологы, Казанның 7-нче шәһәр клиник хастаханәсенең токсикология бүлеге мөдире Алия Насыйбуллина. Мондый эчемлекләрне кулланганда исерү сизелми килә, һәм кеше үзенең халәтен бәяли алмый.

Пациентлар токсикология бүлегенә генә түгел, нейрохирургия, травматология, хирургия профильләренә дә керә. «Исерек килеш дөрес итеп уйлый алмый. Алкоголь кулланганнан соң еш кына кешеләр урамга, паркка чыга, анда эчүләрен дәвам итәләр. Бу артык туңуга, өшеүгә һәм хәтта аяк-кулларның ампутациясенә китерергә мөмкин», – дип сөйләде Алия Насыйбуллина.

Хәтта зур булмаган күләмдә алкоголь куллану йөрәк-кан тамырлары һәм нерв системаларының торышында тискәре чагылыш табарга мөмкин. «Алкоголь куллануның оптималь дозасы юк, ул теләсә кайсы очракта бөтен организмга зыян китерә һәм иң күңелсез нәтиҗәләргә китерергә мөмкин», – дип билгеләде Алия Насыйбуллина.

Сыйфатсыз алкоголь яки суррогат куллану очракларысирәк түгел, бу хәтта инвалидлыкка һәм сукыраюга да китерергә мөмкин. Суррогат продукция белән агуланган барлык пациентлар диярлек кулдан спиртлы эчемлекләр сатып алган. Табиблар киоскларда, танышлар аша, рөхсәт ителмәгән сәүдә урыннарында алкоголь сатып алмаска киңәш итә. Шулай ук табиблар, яңа ел бәйрәмнәре булуга карамастан, алкогольне артык күп кулланмаска киңәш итә. «Яңа ел бәйрәмнәрендә вакытны күңелле үткәрү өчен эчү мәҗбүри түгел, саф һавада ял итәргә, паркларда күңел ачу программаларында катнашырга мөмкин. Болар барысы да организм өчен зур файдалы булачак», – дип саный Алия Насыйбуллина.

Шулай ук укыгыз

Барлык яңалыклар