ТР Гидрометеорология һәм әйләнә-тирә мохитне күзәтү идарәсе: республикада аномаль салкын һава 9 нчы декабрьгә кадәр сакланачак

Төнге температура -15-20 градус булачак, көндез -10-15 градуска кадәр җылыначак.

Фото: Денис Гордийко

(Казан шәһәре KZN.RU, 6 нчы декабрь). Татарстанда тәүлеклек уртача температура -9 һәм аннан да түбән булган аномаль салкын һава торышы 9 нчы декабрьгә кадәр сакланачак. Бу хакта республика Гидрометеорология үзәге кисәтә.

Фаразлауларга караганда, 6 нчы декабрьдән 9 нчы декабрьгә кадәр Татарстан Республикасы территориясендә явым-төшемнәр булмаячак диярлек. Төнге сәгатьләрдә -15-20 градуска кадәр суык булачак, аязган вакытта түбән урыннарда -21-26 градуска кадәр суытачак.

Көндез термометр баганалары -10-15 градуска кадәр күтәреләчәк, 9 нчы декабрьдә һава температурасы -7-12 градус булачак. Юлларда бозлавык саклана.

10 нчы декабрьдә Татарстанда һава торышы үзгәрәчәк. Синоптиклар төньяк-көнбатыш циклонның фронталь бүлеге белән бәйле рәвештә кар булачак дип җиткерә. Төнге температура -7-12 градус чигендә булачак, көндез -4-9 градуска кадәр җылыначак, дип хәбәр итә ТР Гидрометеорология үзәге.

Шулай ук укыгыз

Барлык яңалыклар