НОПРИЗ конкурсында Казанның Генераль планы беренче урынны алды

Быел конкурста катнашуга 19 номинациядә 700 проект кертелде.

Фото: Денис Гордийко

(Казан шәһәре KZN.RU, 15-нче декабрь). Казанның генераль планы Эзләнүчеләр һәм проектлаучылар милли берләшмәсенең 7-нче Халыкара һөнәри конкурсында (НОПРИЗ) беренче урынны алды. Мәскәү Генпланы институты тарафыннан эшләнгән документ «Шәһәр округы (шәһәр җирлеге, авыл җирлеге) генераль планының иң яхшы проекты» номинациясендә катнашты. Әлеге номинациядә шулай ук «Сергиев Посад шәһәр җирлегенең генераль планы» проекты да җиңүче булды.

Быел конкурста катнашуга 19 номинациядә 700 проект кертелде, алар архитектура, шәһәр төзелеше һәм эзләнү эшчәнлегенең барлык аспектларын үз эченә ала. Шул исәптән 31 проект чит ил катнашучыларыннан һәм 348 проект - 55 Россия һәм 7 чит ил профильле югары уку йорты студентлары һәм аспирантларыннан. Катнашу географиясе Россиянең барлык федераль округларын, шулай ук Әрмәнстан, Беларусь, Йәмән, Казахстан, Кыргызстан, Днестр буе һәм Үзбәкстанны колачлый.

Конкурс комиссиясе 386 проект авторын бүләкләү карарын кабул итте, шул исәптән беренче дәрәҗәдәге 92 диплом бирергә, дип хәбәр ителә НОПРИЗ сайтында. Аерым алганда, Мәскәү Генпланы институты конкурсның өч номинациясендә җиңде.

Конкурсның төп максатлары булып Россия һәм чит илләрдә шәһәр төзелеше, архитектура проектлавы һәм инженерлык тикшеренүләре өлкәсендә иң яхшы казанышларны күрсәтү, инновацияләрне һәм алга киткән технологияләрне гамәлгә кертүгә ярдәм итү, җәмгыятьнең һөнәргә һәм эшчәнлек нәтиҗәләренә игътибарын җәлеп итү тора.

Исегезгә төшерәбез, Казанның 2040 елга кадәр Генераль планы шәһәр Думасының XXXVIII хисап сессиясендә кабул ителде. Документ якындагы 20 елга шәһәрнең үсеш векторын бирә. Татарстан башкаласының алдагы Генераль планы 2007 елда расланган иде. Яңа документны әзерләү турындагы карар 2014 елда кабул ителде, ул вакытта ачык конкурс нәтиҗәләре буенча Мәскәү Генпланы институты белән контракт төзелде.

Шәһәрнең яңа Генераль планы проекты буенча күп тапкырлар Казанда яшәүчеләр белән фикер алышынды, депутатлар һәм Башкарма комитетның структур бүлекчәләре җитәкчеләре гавами тыңлауларда катнашты, ишегалларында, торак массивларда иҗтимагый фикер алышулар уздырылды, хезмәт коллективлары белән очрашулар үтте. Проект тиешле федераль һәм республика министрлыкларында һәм ведомстволарында, шулай ук коррупциягә каршы экспертиза һәм җайга салу йогынтысын бәяләүдә килештерү узды.

Шулай ук укыгыз

Барлык яңалыклар