Казан Милан шәһәр азык-төлек сәясәте пактының координацион советын җитәкләде

1-нче июньнән 3-нче июньгә кадәр «Сәламәт шәһәрләр. Балалар өчен сәламәт туклану» форумы Милан пактының беренче Евразия форумы булачак.

Фото: Денис Гордийко

(Казан шәһәре KZN.RU, 25-нче май). Казан Милан шәһәр азык-төлек сәясәте пактының координацион советын җитәкләде. 1-нче июньнән 3-нче июньгә кадәр шәһәрдә беренче тапкыр «Сәламәт шәһәрләр. Балалар өчен сәламәт туклану» дип аталган халыкара форум узачак, ул шулай ук Милан пактының беренче Евразия төбәк форумы булачак. Форум Казан Мэриясе һәм ТР Сәламәтлек саклау министрлыгы тарафыннан Милан пакты секретариаты ярдәмендә, шулай ук БМОның Бөтендөнья сәламәтлек саклау һәм азык-төлек оешмасы вәкилләре катнашында үткәрелә.

Милан пакты Ауропада туклану өлкәсендә әһәмиятле инновацион шәһәр стратегиясе һәм Милан EXPO 2015 күргәзмәсенең төп мирасы булып тора. Ул азык-төлек сәясәте өлкәсендә бөтен дөнья буйлап башка шәһәрләр белән тәҗрибә алмашырга мөмкинлек бирә. Пакт 2015 елның 15-нче октябрендә Миланда имзаланган. Хәзерге вакытта аны 215 шәһәр имзалаган, шул исәптән ике Россия шәһәре – Мәскәү һәм Казан.

Татарстан башкаласы кергән Милан шәһәр азык-төлек сәясәтенең Координация советы дөньяның төрле илләреннән 13 шәһәрне берләштерә һәм аларга азык-төлек сәясәте өлкәсендә тәҗрибә уртаклашырга мөмкинлек бирә. Казан Тель-Авив шәһәре белән берлектә «Евразия һәм Көньяк-Көнбатыш Азия» төбәгеннән Координация Советы составына керә. Пактның беренче Евразия форумы һәм «Сәламәт шәһәрләр. Балалар өчен сәламәт туклану» халыкара форумы узачак.

Форум онлайн һәм офлайн-форматларда узачак һәм Милан пактының координация советында Казан әгъзалыгы кысаларында беренче халыкара вакыйга булачак. Ачылу тантанасы 1-нче июньдә Игенчеләр сараенда узачак. Шул ук көнне балаларга сәламәт туклану һәм азык-төлек гадәтләре турында лекторий, рәсемнәр күргәзмәсе, кулинария мастер-класслары, популяр блогерлар белән очрашулар узачак.

Икенче көнне, 2-нче июньдә, форумда катнашучылар Казан ратушасында очрашачак. Форумның төп чараларыннан берсе – Мэрларның түгәрәк өстәле булачак, анда БМО структуралары вәкилләре һәм азык-төлек сәясәтенең Милан пактында катнашучы шәһәрләр җитәкчеләре катнашачак. Муниципалитетлар вәкилләре, сәламәтлек саклау һәм мәктәп туклануы өлкәсендәге белгечләр тәҗрибә алмашу, балаларның сәламәт туклануын тәэмин итү өлкәсендәге актуаль темалар һәм проблемалар турында фикер алышу өчен җыелачак. Балалар туклануын оештыру, сәламәт яшәү рәвешен формалаштыруның төрле аспектлары, сәламәт шәһәр планлаштыру, туклану экологиясе һәм башка темалар буенча фикер алышулар узачак.

Форумның йомгаклау көнендә эшлекле сессияләр, пленар дискуссияләр һәм төрле регионнар тәҗрибәсе турында фикер алышу белән муниципаль дәрәҗәдә иҗтимагый сәламәтлекне ныгыту эшенә багышланган түгәрәк өстәлләр планлаштырылган, дип хәбәр иттеләр Халыкара һәм муниципальара элемтәләр идарәсендә.

Шулай ук укыгыз

Барлык яңалыклар