Ике уку залы, кафетерийлар һәм китапларны тану системасы: Казанда үзәк китапханәне ремонтлаячаклар

Узган ел Татарстан башкаласында 13 нче номерлы китапханә филиалы модернизацияләнде.

Фото: Денис Гордийко

(Казан шәһәре KZN.RU, 6 нчы февраль, Диана Жиленкова). Быел Казанның Вишневский урамындагы Үзәк китапханәсе бинасын ремонтлаячаклар. Гомуми мәйданы 1 мең кв.метрдан артык булган объект 1987 елда төзелгән. Бинада 2 уку залы һәм кафетерий зонасы булачак. Китапларны тануның электрон системасын кертү планлаштырыла. Бу хакта Башкарма комитетта узган эшлекле дүшәмбе киңәшмәсендә Социаль өлкә учреждениеләрен карап тоту һәм хезмәт күрсәтү департаменты директоры Петр Королев хәбәр итте.

«Без әлеге биналарны реновацияләү һәм реконструкцияләү сәясәтен генә дәвам итмибез – бу китапханәләрнең бөтенләй башка дәрәҗәсе, – дип шәрехләде Мэр Илсур Метшин. - Студент булган чакларда без анда үзебез йөрдек. Бу торак микрорайон, анда бик күп укытучылар, профессуралар. Шуңа күрә без, бу позицияләрдән чыгып, быел проектны тормышка ашырырга җыенабыз».

Моңа кадәр Хөсәен Мәүлетов урамындагы 13 нче номерлы китапханәнең филиалы ремонтланды һәм Юдино поселогындагы 10 нчы музыка мәктәбендә эшләр тәмамланган.

2022 елда ТР башкаласында П.И.Чайковский исемендәге 1 нче балалар музыка мәктәбенә капиталь ремонт ясалды, ул республика әһәмиятендәге мәдәни мирас объекты булып тора. «Чын сәнгать храмы килеп чыкты, – дип хис-кичерешләре белән уртаклашты Илсур Метшин. - Эш җиңел алып барылмады, чөнки ул мәдәни мирас объекты. Казан – мәдәни мирас объектлары саны буенча абсолют лидер. Бу зур кыенлыклар, ләкин шул ук вакытта ремонт тәмамлангач, бу безгә – моны эшләүчеләр өчен дә чын бәйрәм, һәм беренче чиратта бу объектларга йөргән һәм анда шөгыльләнгән балалар һәм шәһәрлеләр өчен».