80 нән артык илдән килгән делегатлар Казан глобаль яшьләр саммитында катнашу өчен гариза бирде

Быел төп көн тәртибе балалар һәм яшьләрне тәрбияләүдә традицион кыйммәтләрнең роле булачак

Фото: Марат Мөгыйнов

(Казан шәһәре KZN.RU, 24 нче август). II Казан глобаль яшьләр саммитында катнашу өчен дөньяның 80 нән артык иленнән 4 мең делегаттан гаризалар килгән. Бу хакта чараны уздыруга багышланган матбугат конференциясендә ТР Яшьләр министрлыгы башлыгы Ринат Садыйков сөйләде.

Министр сүзләренчә, эшлекле программа кысаларында Татарстан җитәкчелеге һәм Ислам хезмәттәшлеге оешмасы илләренең яшьләр корпусы, шулай ук федераль үзәк коллегалары катнашында пленар сессия көтелә.

«Быелгы саммитның төп көн тәртибе балалар һәм яшьләрне тәрбияләүдә традицион кыйммәтләрнең роле булачак. Хәзерге дөньяда бу иң мөһим һәм актуаль темаларның берсе», - дип ассызыклады спикер.

Хәзерге вакытта чарада катнашуны 30 дан артык илдән 120 делегат раслады, дип өстәде Яшьләр дипломатиясе академиясе рәисе Дилбәр Садыйкова.

Исегезгә төшерәбез, саммитның эшлекле программасы 28-29 нчы августка планлаштырылган, ә 30 нчы августта катнашучылар Татарстан Республикасы көнен бәйрәм итү чараларында катнашачак.

Узган ел Казан «Ислам хезмәттәшлеге оешмасының яшьләр башкаласы – 2022» статусына лаек булды. Халыкара программа барышында шәһәрдә 76 илдән бер меңнән артык делегат катнашында 10 нан артык чара узды. Елның төп вакыйгасы Казан глобаль яшьләр саммиты булды, ул ел саен уздырылу хокукын алды.

Шулай ук укыгыз

Барлык яңалыклар