«Келиндер», «Чәчәкле агач» һәм «Аккошлар»: Казанда урамнарны чәчәк белән бизәү эшенә керештеләр

Урамнарда барлыгы 456 мең чәчәк үсентесе утыртылачак

Татарстан башкаласында чәчәкләр белән бизәү буенча эшләр башланды: шәһәр хезмәтләре Казан урамнарына, мәйданнарына һәм паркларына 456 мең чәчәк утыртачак. Эшләр 7,6 мең кв. метр мәйданда алып барыла.

Җәйге чәчәкле бизәлеш шәһәрнең 45 урамында барлыкка киләчәк. Үзәк урамнарга – Лобачевский, Мәрҗани, Карл Марс, Большая Красная, Горький, Бауман, Кремль, Пушкин һәм башкаларга аерым игътибар биреләчәк. Иң зур чәчәклекләр Меңьеллык мәйданын, Батурин, Лобачевский, Девятаев урамнарын, Оренбург трактын бизәячәк.

Сальвия, бегония, петуния, бәрхет гөл үсентеләре, шулай ук цинерария, табак, целлозия һәм канна үсентеләре әзерләнгән. Төсләр палитрасы мөмкин кадәр күптөрле: кызыл, алсу, шәмәхә, зәңгәрсу, сары, кызгылт сары һәм ак. Үсентеләрне гыйнвар аеннан «Горводзеленхоз» МУП тресты теплицаларында үстергәннәр.

«Яңа теплицалар төзү шәһәрнең чәчәкле бизәлешен сыйфат ягыннан яңа дәрәҗәгә күтәрергә мөмкинлек бирәчәк. Аларда кул хезмәте күләме кимиячәк. Ә зурайтылган мәйданнар һәм яңа технологияләр шәһәр киңлеге өчен чәчәкләр күләмен арттырырга мөмкинлек бирәчәк. Чәчәкләр шәһәрне бизәп кенә калмый, алар кәефне күтәрә, кешеләргә хис-кичерешләр бүләк итә. Бу – шәһәрнең иминлек символы», – диде шәһәр мэры Илсур Метшин.

Традицион клумбалардан тыш, шәһәрдә 1100 чәчәкле кашпо урнаштырачаклар, алар үзәк урамнар һәм проспектлар буйлап вертикаль яшелләндерү өстәячәкләр. Кашполар Кремль, Театр, Татарстан, Павлюхин, Назарбаев, Карл Маркс, Вишневский, Каюм Насыйри һәм башка урамнарда барлыкка киләчәк.

Шәһәрдә шулай ук 60 чәчәк фигурасы: «Башкала букеты», «Туп», Универсиада проспектында «Келиндер», Парин урамында «Шарлар», Павлюхин урамында «Аккошлар», «Әкият» курчак театры янында «Чәчәкле агач», «Алиса», «Кролик» композицияләре барлыкка киләчәк.

Исегезгә төшерәбез, узган ел Казанда 56 мең агач һәм 41 мең куак утыртылган иде. Спорт уеннарына һәм БРИКС саммитына 2 мең чәчәкле кашпо һәм 15 мең кв. метр чәчәклек урнаштырганнар. Барлыгы соңгы ун елда – 2014 елдан 2024 елга кадәр – шәһәрдә 544 мең агач һәм 308,4 мең куак утыртылган.

Шулай ук укыгыз

Барлык яңалыклар