Шәһәрнең Авиатөзелеш һәм Яңа Савин районнарында 8 километрдан артык юл ремонтланачак

Эшләр БРИКС илләре саммитына төгәлләнәчәк

Фото: Денис Гордийко

Быел «Сыйфатлы имин юллар» илкүләм проектын һәм «БРИКС илләре саммиты – 2024 маршрутлары буенча урам-юл челтәрен ремонтлау» программасын гамәлгә ашыру буенча эшләр Казанның Авиатөзелеш һәм Яңа Савин районнарындагы алты объектны колачлаячак. Бу хакта шәһәр Башкарма комитетында узган аппарат киңәшмәсендә район администрациясе башлыгы Фәнис Нурмөхәммәтов хәбәр итте.

«Копылов, Гаврилов, Фатыйх Әмирхан, Чистай урамнарында, Ямашев проспектында һәм «Миллениум» күпере янындагы юл чишелешендә барлыгы 8 километрдан артык озынлыктагы алты объектны ремонтлау планлаштырыла», – дип өстәде ул.

2023 елда шәһәрнең ике районындагы җиде объектта юллар ремонтланган. «Сыйфатлы имин юллар» илкүләм проектын гамәлгә ашыру кысаларында Ударная, Вересаев һәм Пржевальский урамнары буенча юл хәрәкәте схемасы үзгәртеп төзелгән. Фәнис Нурмөхәммәтов билгеләп үткәнчә, бу пик сәгатьләрдә юллардагы «бөке»ләрне шактый киметергә мөмкинлек биргән.

«Транспорт инфраструктурасын яхшырту – халык иминлеген тәэмин итүнең мөһим өлеше», – диде ул.

Шулай ук узган ел ике районда 12 километрдан артык озынлыкта 24 урам-юл челтәре объекты ремонтланган. «Миллениум» күперенә керү юллары яңартылган, ә Борисоглебский торак массивы янында күпер реконструкцияләнгән. Районның квартал эчендәге тагын җиде юлында эшләр «Юл-урам челтәрен ремонтлау» программасы нигезендә башкарылган.

Диләрә Гафурова