Казан паркларында узган җәйге чараларда 70 тән артык эшмәкәр катнашты

Шәһәрнең иҗтимагый киңлекләрендә яңа туклану нокталары һәм төрле хезмәтләр эшләтеп җибәрелде

Казанда җәйге программада 70 тән артык эшмәкәр катнашты. Парклардагы вакыйгаларда аларның кереме уртача 200 мең сум тәшкил иткән. Бу хакта аппарат киңәшмәсендә Парклар һәм скверлар дирекциясе җитәкчесе Айгөл Латыйпова хәбәр итте.

«Шәһәрнең иҗтимагый киңлекләрендәге эре чаралар бизнесны үстерү өчен этәргеч булып тора», — дип билгеләде ул.

Аның сүзләренә караганда, ел дәвамында дирекция парклар территориясендә сәүдә нокталары эшен юнәлдерә. Архитектура үзенчәлекләрен һәм киңлекләрдә урнашу мохитен исәпкә алып, җәмәгать туклануының яңа урыннары эшләтеп җибәрелә. Мәсәлән, быел җәй Салават Күпере торак районы паркында «Урман» гаилә кафесы, ә «Казан» Гаилә үзәге территориясендә «Пыяла» кафесы ачылды.

Җәмәгать киңлекләрендә үз хезмәтләрен үстерү — Дирекция командасының бурычларының берсе. «Казан» Гаилә үзәгенең күзәтү мәйданчыгында җәйге сезонда 320 меңнән артык шәһәр халкы һәм кунаклары булды. «1 октябрьдән ул җәдвал буенча көн саен 20:00 гә кадәр эшләячәк. Октябрь уртасына кадәр биредә шулай ук Казан яшь тамашачы театры белән берлектә эшләнгән «Девять этажей любви» аудиоспектакле узачак», – дип хәбәр итте спикер.

Кабан күле яр буендагы барбекю мәйданы килүчеләр өчен хәзер уңайлырак. Бу җәйдән шәһәр халкының рәсми parkikazani.ru сайтында бронь ясау һәм аренда өчен түләү мөмкинлеге барлыкка килде. Бүгенге көндә аннан 800 тапкыр файдаланганнар. Ә Казансу яр буенда яңа хезмәт — веломобиль эшләтеп җибәргәннәр, аны инде 11 мең тапкыр сынап караганнар.

«Черек күл» паркындагы җәйге йортта алты җирле эшмәкәр шәһәр халкына һәм шәһәр кунакларына иң яхшы хезмәтләрен тәкъдим итте. Килүчеләр җәйге сезонның истәлекле бүләкләрен паркларда сатып алганнар, аның нигезенә балалар рәсемнәре салынган.

Моннан тыш, узган шимбәдә җәйге йортта узып баручы сезон белән хушлашу өчен Казан халкы белән бергә «идеаль ял» үткәрделәр. Күшәк тәрәзәләрендә парклар командасы үз куллары белән ясаган, килүчеләрне скверлар белән якыннанрак таныштыра торган «кулдан ясалган эшләр күргәзмәсе» ачылды.