Яңа ел бәйрәмнәре көннәрендә 45 меңнән артык татарстанлы спорт ярышларында катнашачак

Яңа ел бәйрәмнәре вакытында казанлылар профессиональ клублар матчларын карый алачак.

(Казан шәһәре KZN.RU, 24-нче декабрь, Алена Мирошниченко). Татарстанда 1-нче гыйнвардан 8-нче гыйнварга кадәр узачак спорт ярышларында 45 меңнән артык кеше катнашачак. Яңа ел бәйрәмнәре көннәрендә республикада 200-гә якын спорт чарасы – чаңгыда узышу, хоккей, шашка, шахмат, волейбол, футбол, өстәл теннисы, футбол һәм башка популяр спорт төрләре буенча ярышлар узачак. Бу хакта бүген ТР Министрлар Кабинетында узган брифингта Татарстан спорт министры Владимир Леонов сөйләде.

«Республиканың барлык шәһәр һәм районнарында тимераякта массакүләм шуу өчен мәйданчыклар, чаңгы трассалары әзерләнәчәк, спорт инвентаре прокаты оештырылачак. Казанда гына да 19 шугалак, 78 хоккей тартмасы һәм 8 яктыртылган чаңгы трассасы эшләячәк. Массакүләм шуу өчен 9 ябык боз аренасы, стадионнарда, шулай ук Кремль яр буендагы ачык һавада ясалма бозлы шугалаклар әзер», - диде В.Леонов. Республиканың 45 муниципаль берәмлегендә 619 хоккей корты һәм 72 модульле чаңгы базасы эшли, алар барысы да халык өчен ачык.

Яңа ел бәйрәмнәре вакытында казанлылар профессиональ клублар матчларын карый алачак: 5-нче гыйнварда «Ак Барс» клубы «Татнефть-Арена»да –Чиләбенең «Трактор»ы, 7-нче гыйнварда – Магнитогорскиның «Металлург»ы, ә 9-нчы гыйнварда Түбән Новгородның «Торпедо»сы белән уйнаячак. УНИКС 4-нче гыйнварда Сарытауның «Автодор» командасы белән очрашачак. 8-нче гыйнварда «Динамо-Казан» туплы хоккей клубы «Ракета» стадионында Иркутскиның «Байкал-Энергия» командасына каршы уйнаячак.

Шулай ук укыгыз

Барлык яңалыклар