«Тыңлыйбыз» проекты эшли башлаганнан бирле 30 дан артык казанлы түләүсез психологик ярдәм алды

Консультацияләр ике шәһәр паркында дәвам итә.

Фото: «Ышаныч» МБУ

(Казан шәһәре KZN.RU, 7 нче июль). «Тыңлыйбыз» проекты эшли башлаганнан бирле 30 дан артык казанлы түләүсез психологик ярдәм алды, аның кысаларында теләгән һәркем белгечләргә мөрәҗәгать итә ала. Консультацияләр «Наратлык» паркында һәм Горки-Әмәт урманында алып барыла.

Шәһәрлеләр психологларга гаилә һәм ата-ана мөнәсәбәтләре, борчу, эмоциональ кичерешләр һәм үз тормышларыннан канәгать булмау мәсьәләләре буенча мөрәҗәгать итә. Кабул итүне «Ышаныч» үзәгенең «Сайлау» хезмәте психологлары алып бара.

Исегезгә төшерәбез, психологик ярдәм сорап, «Наратлык» паркында сишәмбе көнне, Горки-Әмәт урманында пәнҗешәмбе көнне мөрәҗәгать итәргә мөмкин. Кабул итү 14:00 дән 17:00 гә кадәр башкарыла. Җәдвәл һава торышы аркасында үзгәрергә мөмкин, дип хәбәр итәләр проектны оештыручылар.

«Сайлау» хезмәтенә психологик ярдәм сорап акция кысаларыннан тыш та мөрәҗәгать итәргә мөмкин. Хәзер «Ышаныч» үзәге бүлегендә ремонт бара, шуңа күрә кабул итү онлайн-консультацияләр форматында башкарыла, моның өчен «Вконтакте» төркеменә язарга кирәк. «Казанлылар беркая бармыйча да, шундый ук профессиналь ярдәм ала алалар. Бу барлык кешеләр өчен дә актуаль, җайлы һәм ачык», - дип билгеләп үтте «Сайлау» хезмәте җитәкчесе Илнур Мәсәгыйтов.

Ремонт тәмамланганнан соң белгечләр эш көннәрендә 9:00 дән 17:30 га кадәр Яңа Азино урамы, 2 һәм 2 нче Юго-Западная урамы, 32 адресы буенча урнашкан хезмәт биналарында кабул итәчәкләр. Кабул итү бинасында консультация алу өчен дә бергәлеккә хәбәр җибәреп язылырга кирәк.

Исегезгә төшерәбез, «Ышаныч» балаларга һәм яшьләргә психологик-педагогик ярдәм күрсәтү үзәге бүлекчәләрен капиталь ремонтлау сентябрьгә тәмамланачак.

Шулай ук укыгыз

Барлык яңалыклар