Россия Банкы: 3 ай эчендә Татарстанда 81 ялган акча билгесе ачыкланган

Табылган ялган акча билгеләренең күпчелеге – 5000 сум номиналлы банкнотлар.

Фото: Денис Гордийко

(Казан шәһәре KZN.RU, 27 нче октябрь). Июль-сентябрь айларында Татарстанның банк секторында ялган билгеләре булган 81 Россия акча билгесе ачыкланган. Бу узган кварталдагыга караганда 45% ка кимрәк. Статистиканы Россия Банкы бүлеге – Татарстан Республикасы буенча Милли банк китерә.

Ялган акча билгеләрнең күпчелеге – 60 данә – бу 5000 сумлык банкнотлар. 2000 сумлык ялган банкнотлар – 12 данә, 1000 сумлыклар 7 данә табылган. Шулай ук ялган 10 сумлык тәңкә дә табылды.

Моннан тыш, чит илнең ике ялган банкноты ачыкланды – бу 50 һәм 100 доллар номиналлы АКШ акчасы.

Һәркем Россия банкнотларының чынлыгын махсус җиһазларсыз мөстәкыйль рәвештә тикшерә ала. Моның өчен ким дигәндә өч саклагыч билгегә игътибар итәргә кирәк, аларны тотып карап, утка каршы тотып һәм күрү почмагын үзгәрткәндә белеп була.

Банкнотларның чынлык билгеләре турындагы мәгълүмат Россия Банкының рәсми сайтында «Наличное денежное обращение» бүлегендә һәм «Банкноты Банка России» бушлай мобиль кушымтасында урнаштырылган.

Чынлыгы шикле банкнотлар очраса, аны кәгазь акча белән операцияләр башкаручы теләсә кайсы банк бүлекчәсенә экспертизага бирергә кирәк.

Шулай ук укыгыз

Барлык яңалыклар