Азат Нигъмәтҗанов «Молодежный» торак комплексының икенче йорты турында: «Төзелештә эш кайный башланганлыгы сизелә»

«Ак таш» компаниясе объектта эшләүчеләр санын 280-нән 350-гә кадәр арттырырга уйлый.

(Казан шәһәре KZN.RU, 12-нче август, Алсу Сафина). «Ак таш» компаниясе «Фон»ның Нокса авышлыгындагы «Молодежный» торак комплексының икенче йортында эшчеләр санын 350 кешегә кадәр арттырырга ниятли. Бу төзелеш-монтаж эшләрен вакытында - август ахырына кадәр тәмамларга мөмкинлек бирәчәк. Хәзер объектта 280 кеше эшли. «Төзелештә эш кайный башланганлыгы сизелә», - дип билгеләп үтте бүген өлеш кертеп төзүнең проблемалы объектлары буенча үткәрелгән традицион күчмә киңәшмәдә Казан Башкарма комитеты җитәкчесенең беренче урынбасары Азат Нигъмәтҗанов.

«Ак таш» төзелеш компаниясе директоры Газинур Әхмәтов торак комплексның икенче йортында эшләрнең барышы турында сөйләде. Лифтлар буенча беренче түләү үткәрелде, һәм тәэмин итүче аларны китерүне раслады. Сантехника буенча эшләр дәвам итә: якын арада счетчиклар, краннар, җылылык төеннәре, суырткычлар китереләчәк. Канализация һәм су белән тәэмин итү эшләре төгәлләнде, киләсе атнада төзелеш мәйданчыгына блоклы шәхси җылылык пункты китереләчәк. Электрика эшләре тәмамлануга якынлаша. Г.Әхмәтов билгеләп үткәнчә, отделка эшләре бара, шул исәптән штукатур, плитә һәм башкалар. Моннан тыш, киңәшмәдә катнашучылар йорт яны территориясен төзекләндерү турында да фикер алыштылар. «Ак таш» директоры объектка өстәмә эшче көчләрне җәлеп итәргә ниятләве турында хәбәр итте.

«350 кеше - барысын да вакытында башкарырга һәм төзелеш-монтаж эшләрен август ахырына тәмамларга мөмкин булган белгечләр саны», - дип билгеләп үтте өлешчеләр белән аралашу вакытында Башкарма комитет җитәкчесенең беренче урынбасары Азат Нигъмәтҗанов.

Исегезгә төшерәбез, йортта эшләр 2018 елның көзендә яңартылды. Эшләрнең бер өлешен, өлешчеләр акчасына, «ГК «СК Строй» җаваплылыгы чикләнгән җәмгыяте башкарган, хәзер объектны төзеп бетерү белән «Ак таш» шөгыльләнә - 2018 елда төзелгән өлешчеләргә ярдәм итү республика фонды катнашында. Объектны төзеп бетерүне финанслау подрядчыга -«Ак таш»ка - 33-нче хәрби шәһәрчектә 28 мең кв.м мәйданлы республика җир кишәрлеген бирү юлы белән башкарыла.

Киңәшмә «фон»ның икенче торак комплексы - «МЧС» йортларының төзелеш мәйданчыгында дәвам итте. Бүгенгә торак комплексының икенче йортында бер үк вакытта ике подрядчы эшли - «Комосстрой Казан», ул Губкин урамы буенча урнашкан 9409 кв.м мәйданлы федераль җир участогын бүлеп бирү хисабына «А» блогын төзи, һәм «Ак таш». Шул ук вакытта иң аз әзерлек дәрәҗәсендә булган өченче һәм дүртенче йортларны төзү эшләре бара. Газинур Әхмәтов хәбәр иткәнчә, өч объектка аларның компаниясе 400-дән артык белгечне җәлеп иткән. Исегезгә төшерәбез, «Ак таш» компаниясе узган елның декабрендә өлешле төзелештә катнашучы гражданнарның хокукларын яклау федераль фонды белән имзаланган килешү кысаларында эшли. Финанслау федераль һәм республика акчалары хисабына гамәлгә ашырыла.

Киңәшмәдә шулай ук Капиталь төзелеш һәм реконструкция идарәсе башлыгы Марат Сәмигуллин, өлешчеләргә ярдәм итү фондының башкарма директоры Иван Новиков, челтәр оешмалары вәкилләре катнашты.