«Soprano Турецкого» арт-төркеме Казанда «Роналд Макдоналд йорты»нда булды

Кунаклар Балалар республика клиник хастаханәсенең кечкенә пациентларын һәм аларның ата-аналарын Яңа ел белән котладылар.

(Казан шәһәре KZN.RU, 5-нче гыйнвар). «Soprano Турецкого» арт-төркеме Казанда «Роналд Макдоналд йорты»нда булды.

Бушлай гаилә кунакханәсендә Балалар республика клиник хастаханәсендә озак дәваланучы балаларның гаиләләре яши. Кунаклар йорт буенча экскурсия ясадылар һәм нәни пациентлар белән аралаштылар.

Иң популяр музыкаль төркемнәрнең берсен балалар гына түгел, аларның әти-әниләре дә түземсезлек белән көтте. Кунаклар һәр балага игътибарлы булдылар. Төркемдә катнашучылар кечкенә пациентларны һәм аларның ата-аналарын Яңа ел җырларын башкарып котладылар һәм бүләкләр тапшырдылар.

Саубуллашканда артистлар йортның кунаклар язмалары өчен билгеләнгән китабында үз фикерләрен яздылар: «Тылсымлы балалар һәм искитмәле персоналы булган үзенчәлекле йорт! Сезгә могҗизалар, күтәренке кәеф, йөрәкләрдә музыка уйнавын һәм нык сәламәтлек телибез!».

Очрашу автограф-сессия белән тәмамланды, дип хәбәр итә «Роналд Макдоналд йорты» хәйрия фонды.

Шулай ук укыгыз

Барлык яңалыклар