Яңалыклар
01.12.2022, 14:15
Архитекторлар Цимайло һәм Ляшенко: «Без Казан җитәкчелеге һәм халкы арасында фикердәшләр булуын күрәбез»
Мәскәү архитекторлары фикеренчә, Казан үзенең «яшь» энергетикасы белән аерылып тора һәм бу аның башка шәһәрләр алдында өстенлеге.
Фото: Денис Гордийко
Мәскәү архитекторлары, форумны уздыруның гадәти булмаган урынына игътибар итеп, янә Казанга килүләренә шат булуларын билгеләп үттеләр. «Без күптән түгел шушы ук мәйданда булдык, биредә тимераякта, велосипедта йөргән кешеләр бар иде. Ул вакытта барысын да күзәттек, һәм монда фантастик атмосфера белән шушындый вакыйга була алуын, скейт-паркны башка функциягә тиз үзгәртеп булуын күз алдына да китереп булмады. Шуның турында сөйләрбез дә: объектка башка күзлектән карасак, искиткеч нәтиҗәләргә ирешергә мөмкин, һәм бу очракта ул килеп чыкты. Оештыручыларга моның өчен зур рәхмәт», – дип мөрәҗәгать итте аудиториягә Александр Цимайло.
Николай Ляшенко Казан үзенең «яшь» энергетикасы белән аерылып торуын дәвам итте, бу аның башка шәһәрләр алдында өстенлеге булып тора. «Казанга бик теләп киләм. Миңа калса, шәһәр үсешенең төп ачкычы – кешеләрдә булган драйв һәм энергия. Без биредә дуслар, танышлар таптык, алар арасында – студентлар, эшмәкәрләр, шәһәр җитәкчелеге вәкилләре. Бу шәһәрне яшәтүче ниндидер гомуми энергия. Шуңа күрә Казан турында, яшьләр өчен шәһәр буларак сөйләсәк, бу концепция аеруча да кирәк. Мәскәү консервативрак һәм хәрәкәтсезрәк булырга мөмкин, ә Казанда барысы да тиз үсеш ала», – дип хис-кичерешләре белән уртаклашты.
Мәскәү архитекторлары халыкка илнең һәм дөньяның төрле шәһәрләрендә инде тормышка ашырылган берничә проектны тәкъдим иттеләр, Казан да нәкъ менә шундый сценарий буенча барырга мөмкин. Әйтик, Николай Ляшенко Берлинның иске фабрикасы турында сөйләде, ул бөтен шәһәрдән меңләгән яшьләрне тарту ноктасына әйләнгән. «Бина бөтенләй ташландык хәлдә иде, берничә тапкыр кулдан-кулга күчте. 80 нче елларда мэрия бу мәйданнарны остаханә ясар өчен рәссамнарга бирергә булды, алар өчен урын юк иде. Бу берникадәр вакыт «маргиналь» бина булды, ләкин вакыт узу белән иҗади көчләр тартылды, күргәзмә урыннары ачылды. Бу театр шәхесләрен кызыксындырды. Шулай итеп, 30 ел эчендә әлеге квартал мәдәни Мәккәгә әйләнде, ул бөтен тирә-юньне үстерү өчен драйвер булды. Анда килү абруйлы иде. Аннары, девелоперлар моның яхшы урын булуын аңладылар һәм әлеге квартал тирәсендәге участокларны сатып ала башладылар. Тирә-юньдә элиталы йортлар барлыкка килә башлады, янәшәдә яшәү дәрәҗәле булды, һәм бу территориянең үсеше бөтенләй башка характерга ия булды», – дип сөйләде ул.
Александр Симайло шәһәр урыннарын «үзгәртү» буенча теләсә нинди проектларны булачак урыннарны һәм биналарны программалаштырудан башлау мөһим, дип өстәде. «Бу җәһәттән без шәһәр җитәкчелеге, архитекторлар һәм шәһәрлеләр арасында фикердәшләр булуын күрәбез. Мәскәүдә, Питерда, Казанда һәм башка шәһәрләрдә проектларның уңышы – бу синергия, төрле дисциплиналар, кешеләр, оешмаларның үзара хезмәттәшлеге. Без, архитекторлар, биналар һәм киңлекләр яхшы эшләсен өчен, күзгә рәхәт булсын өчен әлеге программалашуны тормышка ашырабыз», – диде Александр Симайло. Аның фикеренчә, мондый мисалларның берсе – Мәскәүдә яңа ачылган конструктивизм музее. Иске бинадан, элеккеге икмәк заводыннан, күргәзмәләр, кинотеатр һәм күп өстәмә үзенчәлекләр белән мәдәни үзәк ясарга туры килгән.
Исегезгә төшерәбез, сентябрьдә Казанда Порт урамы янындагы территорияне комплекслы үстерү кысаларында беренче микрорайон төзелешен башлап җибәрү – депрессив сәнәгать зонасын масштаблы үзгәртү тантанасы булды. Беренче торак комплекс проектын эшләүгә архитекторлар Александр Цимайло һәм Николай Ляшенко җәлеп ителде, алар «АрхМосквы» версиясе буенча 2022 елда Россиядә иң яхшылар дип табылды.
Фоторепортаж
«Урам» экстрим-паркында «Казаныш» архитектура форумы ачылды, 01.12.2022
Видеорепортаж
01.12.2022
15:27
«Урам» экстрим-паркында «Казаныш» архитектура форумы ачылды, 01.12.2022
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:02 -
29.04.2025, 10:11
