«Том Сойер Фест» хәрәкәте активистлары Казанда Покровский йортын торгызачак

Активистлар Шмидт урамы, 6 адресы буенча урнашкан йортны яңартуга алыначак.

Казан шәһәре KZN.RU, 9-нчы апрель, Зилә Гайфи). Бу җәйдә Казанда «Том Сойер Фест» тарихи мохитне торгызу фестивален дәвам итү планлаштырыла. Хәрәкәт активистлары Покровский урамындагы агач төзелеш сәнгате һәйкәлен - Шмидт урамы, 6 адресы буенча урнашкан йортны яңартуга алыначак.

Покровский йорты - тарих һәйкәле. Биредә 1902-1941 елларда тарихчы һәм туган якны өйрәнүче, профессор Иван Михайлович Покровский, 1929-1989 елларда галим-геолог, профессор Виктор Иванович Троепольский яшәгән. Фестиваль координаторы Дмитрий Полосинның сүзләренә караганда, йортны яңарту инициативасы белән биредә яшәүчеләр үзләре мөрәҗәгать иткән. «Без шәхси милектәге объектлар белән эшлибез. Өйдә объектның тарихи йөзен кайтаруны хуплаган хуҗаларның булуы мөһим. Кагыйдә буларак, без реконструкция белән шөгыльләнмибез, волонтерлар фасад буенча эшләрне генә үти: иске буяуны алу һәм яңасын салу, вак детальләрне алыштыру. Бу эшләр махсус күнекмәләр таләп итми», - дип сөйләде ул KZN.RU порталына.

Бүгенге көндә коронавирус инфекциясе таралу аркасында эпидемиологик вәзгыять фестивальне оештыручыларның планнарына төзәтмәләр кертте. Әгәр моңа кадәр бер җәйге сезон эчендә волонтерлар берничә йортта эшләр башкарган булса, быел бер генә объект - Покровский йорты гына булачак. «Җәйге фестивальгә әзерлек гадәттә кыш көне башлана иде, февральдән башлап без йортта яшәүчеләрдән килгән гаризаларны карадык, мартта объектлар исемлеге формалашты. Хәзер без үз эшчәнлегебезне тулы күләмдә алып бара алмыйбыз, шуңа күрә бер генә йорт сайланды. Асылда, аны яңартырга гына кирәк, бу зур кертемнәр таләп итми», - дип билгеләде Дмитрий Полосин.

Покровский йортының тарихи йөзен кайтару эшләренә июль ахырында - август башында керешү планлаштырыла. Гадәттә «Том Сойер Фест» фестивале объектларында бер ай дәвамында алдан белем алу уза торган 15-20 волонтер эшли. Дмитрий Полосинның сүзләренә караганда, волонтерларны җыю эше даими рәвештә алып барыла. Оештыручылар үз теләкләре белән өйләрен торгызуга ярдәм итәрлек партнерлар һәм иганәчеләр эзли. Фестивальне уздыруның барышын Казан хәрәкәтенең сайтында һәм социаль челтәрләрендә күзәтергә мөмкин булачак.

Исегезгә төшерәбез, «Том Сойер Фест» – активистлар һәм волонтерлар тарихи шәһәр төзелеше объектларын ремонтлауны күздә тота торган фестиваль. Тарихи мохитне яклауга бу хәрәкәт Россиянең 50-гә якын шәһәрен җәлеп итте. Казанда фестиваль 2016 елда башланды. Фестивальнең дүрт сезонында активистлар 15 бинаны ремонтладылар. 2019 елда активистлар Калинин урамындагы 12-нче йортны, Фатыйх Кәрим урамындагы 11-нче йортны - Беркутов йортын һәм Волков урамындагы 42-нче йортны - Богородский йортын торгыздылар.

Шулай ук укыгыз

Барлык яңалыклар