Актер Антон Шагин Казанда Никита Михалков академиясе абитуриентлары белән очрашачак

Ташламалы уку урыннарына сайлап алу оештырылачак.

Фото: Денис Гордийко

(Казан шәһәре KZN.RU, 6 нчы апрель). 18 нче апрельдә Казанда Н.С.Михалков исемендәге кинематография һәм театр сәнгате академиясенә кастинг узачак. Сайлап алу ташламалы уку урыннарына оештырыла. Шулай ук актер Антон Шагин белән очрашу да планлаштырылган.

Сайлап алуда Татарстан Республикасының иҗади югары уку йортларында «актерлык осталыгы» юнәлеше буенча белем алучы 35 яшькә кадәрге чыгарылыш курс студентлары, шулай ук укуларын тәмамлаган студентлар катнаша ала. Мәҗбүри таләпләр түбәндәгеләр: югары профильле белем булу (яки иҗади югары уку йортының чыгарылыш курсында уку), театр һәм кино өлкәсендә эш тәҗрибәсе. Кастинг әңгәмә форматында узачак, аның нәтиҗәләре буенча абитуриентларны сайлап алуның йомгаклау этабы өчен Мәскәүгә чакырачаклар.

Кабул итү комиссиясенең күчмә утырышы кысаларында 13:00 сәгатьтә Казан дәүләт мәдәният институтының 111 нче аудиториясендә театр һәм кино актеры, РФ Хөкүмәте һәм РФ Президенты премияләре лауреаты Антон Шагин белән иҗади очрашу узачак. Чарада катнашу өчен алдан теркәлү сорала.

Күчмә кабул итү комиссиясе Казан дәүләт мәдәният институтының 18 нче аудиториясендә 14:15 сәгатьтә эшли башлаячак. Алдан теркәлү узарга кирәк.

Быел кабул итү комиссиясе составына Антон Шагин һәм Михаил Милькис – режиссер, музыкант һәм педагог керә, дип хәбәр итә академиянең матбугат хезмәте.