Казанда халык рейтингының төп 10 юлының 9-ы капиталь ремонтланган

Быел юл эшләренә 3 млрд 250 млн сум каралган, шуларның 2 млрд 250 млн сумы республика бюджетыннан бирелә һәм тагын 1 млрд сумы – федераль бюджеттан.

(Казан шәһәре KZN.RU, 5-нче июнь). Казанда «Тузган юллар картасы» интерактив проектында максималь тавыш җыйган 10 юлның 9-ы капиталь ремонтланды. Татарстан башкаласында картага барлыгы 366 участок өстәлде, шуларның 132-се төзекләндерелде, ә 46-сы ремонт планнарында тора.

«Тузган юллар картасы» проектының максаты - гражданнар фикерен исәпкә алып, юл катламын ремонтлау. Беренче чиратта инспекторлар халык рейтингының төп 10 юлы исемлегенә кергән юлларны ремонтлауга игътибар итә. Казанда шундый урамнар арасында – Магистраль, Академик Кирпичников, Әхтәмов, Әмәт һәм Сул як Болак урамнары. Ремонтка мохтаҗ булган юлларның күбесе шәхси секторда урнашкан.

Татарстан Республикасы буенча картага 538 юл өстәлгән һәм 20 меңнән артык тавыш җыелган. Тавыш бирүдә зур активлык ремонт өчен өстенлекле урамнарны билгеләргә ярдәм иткән, шуның нәтиҗәсендә 143 участокка капиталь төзекләндерү үткәрелгән инде, дип хәбәр ителә проект сайтында.

«Казанның башка шәһәрләрдән төп аермасы - гражданнарның үтенечләренә йөз процентка якын килү, югары процент һәм «Тузган юллар картасы» белән яхшы хезмәттәшлек. Ә менә ремонт бара торган участокларда юл хәрәкәте иминлеге турында онытырга ярамый, чөнки чокыр ремонт вакытында да булырга тиеш түгел», - дип билгеләп үтә «Юл инспекциясе гомумроссия халык фронты/Тузган юллар картасы» проекты координаторы Александр Васильев.

Гарантия участоклары да югары бәяләнде: 25 Октябрь ур., Кече Мәскәү, Клара Цеткин, Чистай, Михаил Миль, Ибраһимов проспекты.

Исегезгә төшерәбез, быел юл эшләренә 3 млрд 250 млн сум каралган, шуларның 2 млрд 250 млн сумы республика бюджетыннан бирелә һәм тагын 1 млрд сумы – федераль бюджеттан. «Имин һәм сыйфатлы автомобиль юллары» федераль программасы буенча 32 шәһәр һәм бистә урамын һәм гомуми мәйданы 674 мең квадрат метр булган 19 тротуарны ремонтлау планлаштырыла. Объектлар исемлегенә беренче чиратта «Халык контроле» системасында, «Тузган юллар картасы» интерактив проектында һәм «Халык фронты» иҗтимагый хәрәкәтендәге шәһәрлеләрнең тискәре бәяләмәләре күп булган урамнар кергән.

Шулай ук укыгыз

Барлык яңалыклар