Гастрофестивальдә Татарстанның 89 үзмәшгуле 700 мең сумга якын акча эшләгән

Бушлай бирелгән сәүдә урыннарында алар бизәнү әйберләре, фермер продуктлары, уенчыклар һәм декор әйберләре саттылар.

Фото: Марат Мөгыйнов

(Казан шәһәре KZN.RU, 29 нчы сентябрь). Узган ялларда Казанда Аккош күлендә узган гастрофестивальдә Татарстанның 89 үзмәшгуле 700 мең сумга якын акча эшләгән. ТР Икътисад министрлыгы тарафыннан бушлай бирелгән сәүдә урыннарында эшкуарлар дизайнер бизәнү әйберләре, фермер товарлары, уенчыклар һәм декор әйберләре саттылар.

Бүгенге көндә республикада 214 меңнән артык үзмәшгуль теркәлгән. Мондый ярминкәләр республикада ел дәвамында үткәрелә. Узган чаралар 1 меңгә якын үзмәшгульгә үз эшләрен күрсәтергә, сатып алучылар һәм партнерлар табарга мөмкинлек бирде. Ярминкәләрдә үзмәшгульләр 17 млн сумга якын акча эшләде, дип хәбәр итә ТР Икътисад министрлыгының матбугат хезмәте.

Булачак чаралар һәм үзмәшгульләргә ярдәм итү чаралары турында Эшкуарлыкка ярдәм итү фондының «Минем бизнес» кайнар линиясе номеры буенча белергә була: +7(843)524-90-90.

Исегезгә төшерәбез, Аккош күлендәге гастрофестиваль Казанда 24 нче сентябрьдә узды. Мәйданчыкта 40 тан артык фудтрак урнашты, аларның берсендә 10 минут эчендә 1000 кыстыбый әзерләү буенча рекорд куелды. Фестивальне музыкаль бизәлеш белән шәһәрнең иҗат коллективлары һәм концертның хедлайнеры Тина Кузнецова тәэмин итте.

Шулай ук укыгыз

Барлык яңалыклар