Яңалыклар
19.07.2021, 17:12
79 яшьлек казанлы, улын коткарырга теләп, 255 мең сумнан колак каккан
Пенсионерга шалтыраткан җинаятьче хәбәр иткәнчә, ул кеше бәрдергән.
Фото: Марат Мугинов
(Казан шәһәре KZN.RU, 19-нчы июль). 79 яшьлек казанлы мошенникларга 255 мең сум акча күчергән. Җинаятьче пенсионерга улы буларак шалтыраткан һәм кеше бәрдергәнлеге турында хәбәр иткән.
16-нчы июль көнне ир-ат «Мәскәү» полиция бүлегенә мөрәҗәгать иткән. Ул 3:00 сәгать тирәсендә аңа өй телефонына шалтыратулары турында сөйләгән. Шалтыратуга җавап биргәч, ул улының тавышына бик охшаган тавыш ишеткән. Ул елаган тавыш белән, кеше бәреп үтердем, дип хәбәр иткән. Шуннан соң әңгәмә башка кеше белән дәвам иткән – янәсе тикшерүче белән. Ир-ат зыян күрүченең улы үлем белән тәмамланган юл-транспорт һәлакәте кылуы, әмма билгеле бер түләү өчен җинаять эше кузгатмаска мөмкин булуы турында әйткән. Пенсионер ят кешегә ышанган һәм улына шалтыратып тормаган, чөнки тегесе тоткарланган дип уйлаган. Үзе белән банк карталарын алып, ир-ат банкоматка киткән, аның аша шалтыратучы күрсәтмәләре буенча счетка 255 мең сум акча күчергән. Соңрак җинаятьчеләр кирәкле ришвәт суммасын арттырган һәм ир-атка кредит рәсмиләштерергә киңәш иткән. Әмма ул банк офисына юнәлгән вакытта аңа улы шалтыраткан һәм аның белән барысы да тәртиптә һәм ул хәзерге вакытта дачада булуын хәбәр иткән. Өлкән яшьтәге казанлы үзен алдаганнарын аңлаган һәм полициягә мөрәҗәгать иткән.
Әлеге факт нигезендә «Караклык» маддәсе буенча җинаять эше кузгатылган. Полиция бүлегендә «Мәскәү» тикшерү һәм оператив-эзләү чаралары комплексы уздырыла, дип хәбәр итә РФ Эчке эшләр министрлыгының Казан буенча идарәсе матбугат хезмәте.
Дистанцион караклыкның иң киң таралган схемалары һәм алдакчыларның хәйләләренә ничек эләкмәү турында сылтама буенча укыгыз.
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
