6 нчы апрельдә Казанда Сальвадор Далиның басма графикасы оригиналы күргәзмәсе ачылачак

Экспозициядә шулай ук рәссамның ХХ гасырның 50-70 елларындагы осталарны сурәтләгән фотолары тәкъдим ителәчәк.

Фото: ТР Дәүләт сынлы сәнгать музее матбугат хезмәте

(Казан шәһәре KZN.RU, 31 нче март). 6 нчы апрельдә ТР Дәүләт сынлы сәнгать музеендагы Заманча сәнгать галереясында ХХ гасырның иң танылган рәссамнарының берсе – Сальвадор Далиның оригиналь графикасы һәм эксклюзив фотосурәтләре коллекциясе тәкъдим ителәчәк.

«Сюрреализм – ул Мин» күргәзмәсе Казанга Санкт-Петербургның PS Gallery заманча сәнгать галереясыннан килгән, ул сәнгатьне яратучылар өчен график сәнгатьнең төп нөсхәләрен һәм мультимедия технологияләрен берләштерә.

Оештыручылар билгеләп үткәнчә, экспозиция мультимедия зонасыннан башланачак – тамашачылар рәссамның «Тере төшләре»нә эләгәчәк. Аннары галереяның ике катында «Треуголка», «Божественная комедия», «Песнь Песней царя Соломона», «Озорные сны Пантагрюэля», «Библия», «Двенадцать колен Израилевых», «Посвящение Леонардо да Винчи», «Фауст» һәм башкалар кебек эшләр серияләре урнашачак. Шулай ук Казанга рәссамның 50-70 елларда осталарны сурәтләгән оригиналь фотолары киләчәк.

Күргәзмәнең ачылышына 15:00 сәгатьтә коллекционер, PS Gallery хуҗасы Павел Башмаков киләчәк. «Казан өчен без Сальвадор Дали иҗатын график буларак ачучы искиткеч проект әзерләдек, – дип уртаклашты ул. – Күргәзмәдә сез дөньякүләм танылган сюжетларга багышланган һәм төрле техникада башкарылган 12 эш сериясе белән таныша аласыз».

Күргәзмә ачылышына керү 6 нчы апрельдә 15:00 сәгатьтән 16:00 сәгатькә кадәр бушлай булачак. Ул 2 нче июльгәчә сишәмбедән якшәмбегә кадәр 11:00 дән 20:00 гә кадәр Карл Маркс ур., 57 адресы буенча эшләячәк, дип хәбәр итә ТР Дәүләт сынлы сәнгать музее матбугат хезмәте.

Шулай ук укыгыз

Барлык яңалыклар