35 программа, 23 робот моделе һәм ике спектакль – «Симург» уку елына йомгак ясады

Татарстанда менталь тайпылышлары булган балалар өчен беренче инклюзив ял итү үзәге Балаларны яклау көнен билгеләп үтте.

Фото: Денис Гордийко

(Казан шәһәре KZN.RU, 1 нче июнь). 1 нче июньдә, Балаларны яклау көнендә, Татарстанда «Симург» инклюзив ял итү үзәге беренче уку елына нәтиҗәләр ясады. Әлеге вакыйга уңаеннан үзәк карамагындагы балалар бәйрәм әзерләде, ата-аналарга һәм кунакларга үз дәресләренең нәтиҗәләрен күрсәттеләр. Чараның хөрмәтле кунаклары арасында Россия Дәүләт Думасы депутаты Илья Вольфсон һәм «Игелекле Казан» коммерцияле булмаган автоном оешмасы директоры Татьяна Мерзлякова да бар иде. Исегезгә төшерәбез, үзәк «Әкият» балалар үзәге ярдәме белән 2021 елның сентябрендә «Синең файдага» хәйрия фонды тарафыннан булдырылды.

Программалаштыру студиясендә балалар Scretch телен үзләштергәннәр – бу визуаль объект-юнәлешле мохит гамәлләр алгоритмын төзү өчен туры килә. Эш нәтиҗәсе 35 аркадлы уен һәм программалар булды: мәсәлән, узыш, «Шәһәр өчен көрәш» экшны һәм атаклы «Елан» уены. Робототехника студиясендә беренче уку елын вак моторика үсешенә, механизмнарның һәм аларның состав өлешләренең үзара бәйләнешенә багышладылар. Егет-кызларның 23 модель җыю мөмкинлеге бар иде: вертолет, тиранозавр, су эте, җил тегермәне, чаян һ.б. Яңа елга балалар 3D-каләм ярдәмендә бәйрәм уенчыклары әзерләделәр, алар «Симург» үзәгендә чыршы бизәге булдылар.

Театр студиясендә 8 ай эчендә ике спектакль әзерләргә өлгергәннәр: «Зөбәрҗәт шәһәр тылсымчысы» яңа ел әкияте һәм «Хисләр кайда яши?» йомгаклау спектакле. Өч юнәлеш (актерлык осталыгы, хореография һәм сәхнә сөйләме) эше ярдәмендә балаларда хәрәкәтләрне координацияләү, сөйләм аппараты һәм эмоциональ интеллект үсешендә сизелерлек алга китеш барлыкка килгән. Мондый практикалар аутистик спектрда тайпылышлар булган балалар өчен аеруча мөһим. Әйтик, бер тәрбияләнүче кыз үз сөйләм күнекмәләрен – мелодиканы һәм сөйләм аныклыгын сизелерлек яхшырта алган.

Йомгаклау спектакле өстендә уку елы дәвамында эшләгәннәр – ул үзәк карамагындагы балаларның дәрес вакытында әзерләгән номерларыннан җыелган. «Э-моция» иҗат инклюзив студиясенең сәнгать җитәкчесе һәм режиссеры Неля Суркина аларны бердәм әсәргә берләштерергә ярдәм иткән.

Дәресләрдән тыш, үзәк педагоглары методик әдәбият өстендә эшләгән – Россиядә бүгенге көнгә кадәр аутизмлы балалар белән шөгыльләнү буенча расланган пособиеләр юк. Педагоглар киләсе уку елы башына гомумиләштереләчәк һәм чыгарылачак кайбер тәкъдимнәр эшли алган.

«Без әлеге балаларны берничә ай элек – үзәк ачылышында күрдек, аерма сизелерлек, алар шулкадәр ачылды һәм ныгыды. Педагоглар үз эшләрен яраталар һәм җан атып эшлиләр, шуңа күрә дәресләрдә сизелерлек алга китеш сизелә. Балалар белән һәркем эшли алмый, ә үзенчәлекле балалар турында сөйләп тә торасы юк. «Синең файдага» фонды зур эш башкара алды», – дип билгеләп үтте Дәүләт Думасы депутаты Илья Вольфсон.

«Симург» – Казанда гына түгел, Татарстанда да сәламәтлек мөмкинлекләре чикле булган балалар өчен беренче инклюзив ял үзәге. Ул 7-17 яшьлек балалар һәм яшүсмерләр өчен исәпләнгән.

Татарстан башкаласында инклюзив балалар үзәген булдыру идеясе белән «Синең файдага» хәйрия фонды чыкты, ул Казанда беренчеләрдән булып аутизмлы балалар белән эшли башлады. Әлеге идеяне РФ Дәүләт Думасы депутаты Илья Вольфсон хуплады. Росмолодежь һәм «Татнефть» хәйрия фондыннан 2,6 млн сум күләмендә грант ярдәме белән үзәк эшли башлады. Үзәктә дәресләр 2021 елның сентябрендә өч юнәлеш буенча башланды: программалаштыру, робототехника һәм театр студиясе.